കൊച്ചി: കൊച്ചിയെ ആവേശത്തിലാഴ്ത്തി റോയൽ എൻഫീൽഡിൻ്റെ സ്ട്രീറ്റ് കൾച്ചർ പ്ലാറ്റ്ഫോമായ ‘ഹണ്ടർഹുഡ്’. ഹണ്ടർ 350 മോട്ടോർസൈക്കിളിൽ നിന്ന് പ്രചോദനം ഉൾക്കൊണ്ട് സംഘടിപ്പിച്ച ഈ ഫെസ്റ്റിവൽ, ഡൽഹി, മുംബൈ, ചെന്നൈ തുടങ്ങിയ നഗരങ്ങളിലെ വിജയകരമായ എഡിഷനുകൾക്ക് ശേഷമാണ് ആറാമത് വേദിയിയായി കൊച്ചിയിലെത്തിയത്.
പെയ്തിറങ്ങിയ ചെറിയ ചാറ്റൽ മഴയെപ്പോലും അവഗണിച്ച്, ഇടവിടാതെ ഒഴുകിയെത്തിയ യുവാക്കളുടെ വൻ ജനപ്രവാഹം ഈ മേളയെ യഥാർത്ഥത്തിലൊരു ആഘോഷമാക്കി മാറ്റി. മെയിൻ സ്റ്റേജിൽ ഡാബ്സി, ബേബി ജീൻ, ട്രൈബ് മാമ മേരികാലി തുടങ്ങിയവരുടെ ഊർജ്ജസ്വലമായ ഹിപ്പ്-ഹോപ്പ് പ്രകടനങ്ങളും, കമ്മ്യൂണിറ്റി സ്റ്റേജിലെ ചെണ്ടമേളവും വെസ്റ്റേൺ സംഗീതവും ചേർന്നുള്ള ഫ്യൂഷനും മഴയത്തും കാണികളെ ആവേശത്തിന്റെ കൊടുമുടിയിലെത്തിച്ചു.
മ്യൂസിക്കൽ ജാമിനൊപ്പം ഫ്ലൈ സ്ക്വാഡും കോവളം സ്കേറ്റ് ക്ലബും അവതരിപ്പിച്ച സ്കേറ്റ്ബോർഡിംഗ് ഷോകളും, ട്രെസ്പാസേഴ്സ് ടീമിൻ്റെ മ്യൂറൽ ആർട്ടും, ലൈവ് ഗ്രാഫിറ്റിയും ഇവന്റ്റിന് മാറ്റുകൂട്ടി. കൊച്ചിയുടെ സിനിമാ കൾച്ചറും തെരുവ് ശബ്ദങ്ങളും കോർത്തിണക്കിയ ഇമ്മേഴ്സീവ് ലൈറ്റ് ടണലും, കസ്റ്റം മോട്ടോർസൈക്കിളുകളുടെ പ്രദർശനവും, സന്ദർശകർക്കായി ഒരുക്കിയ സ്കിംബോർഡിംഗ്, ഫുട്ബോൾ വർക്ക്ഷോപ്പുകളും നഗരത്തിന് പുതിയൊരു ഊർജ്ജമാണ് സമ്മാനിച്ചത്. സ്ട്രീറ്റ് കൾച്ചറിനോടും മോട്ടോർസൈക്കിളുകളോടും ഇന്നത്തെ തലമുറയ്ക്കുള്ള കടുത്ത പ്രണയമാണ് ഈ പരിപാടിയിലുടനീളം പ്രകടമായത്.
“മോട്ടോർസൈക്കിളുകൾ ആത്മാവിനെ ചലിപ്പിക്കുന്നു” എന്ന് റൈഡർമാർ പറയാറുള്ളതുപോലെ, ബൈക്കിംഗും സംഗീതവും സ്ട്രീറ്റ് ആർട്ടും ഒന്നിച്ചപ്പോൾ ആത്മാവിനെത്തന്നെ പുതിയൊരു തലത്തിലേക്ക് ഉയർത്തുന്ന അപൂർവ്വ അനുഭവമായി കൊച്ചിയിലെ ഹണ്ടർഹുഡ് മാറി.
