ഗുവാഹത്തി: അസമിലെ മങ്കാച്ചാർ സെക്ടറിലെ ഇന്ത്യ-ബംഗ്ലാദേശ് അതിർത്തിയിൽ സംഘർഷം തുടരുന്നു, ഇരു രാജ്യങ്ങൾക്കുമിടയിലുള്ള ആളില്ലാത്ത സ്ഥലത്ത് ഒമ്പത് ബംഗ്ലാദേശി പൗരന്മാർ കുടുങ്ങിക്കിടക്കുന്നതാണ് പ്രശ്നങ്ങൾക്ക് കാരണം.
അതിർത്തി രക്ഷാ സേന ബംഗ്ലാദേശ് (ബിജിബി) തങ്ങളുടെ പൗരന്മാരെ സ്വീകരിക്കാൻ വിസമ്മതിക്കുന്നതായി കേന്ദ്ര ആഭ്യന്തര മന്ത്രാലയ വൃത്തങ്ങൾ സൂചിപ്പിക്കുന്നു. പ്രശ്നം പരിഹരിക്കുന്നതിനായി അതിർത്തി സുരക്ഷാ സേനയും (ബിഎസ്എഫ്) ബിജിബിയും തമ്മിൽ ഒരു ഫ്ലാഗ് മീറ്റിംഗ് നടന്നെങ്കിലും ഫലമുണ്ടായില്ല. ഇന്ന് വീണ്ടും യോഗം ചേരുന്നുണ്ട്.
മങ്കാച്ചറിലെ ഇന്ത്യ-ബംഗ്ലാദേശ് അതിർത്തിയിൽ ഞായറാഴ്ച മുതലാണ് സംഘർഷാവസ്ഥ ആരംഭിച്ചത്. വൈറലായ വീഡിയോയിൽ, തങ്ങൾ ബംഗ്ലാദേശി പൗരന്മാരാണെന്നും ജോലിക്കായി ഇന്ത്യയിലെത്തിയതാണെന്നും അവരിൽ ഒരാൾ സമ്മതിക്കുന്നത് കേൾക്കാം. “ഞങ്ങൾ ബംഗ്ലാദേശി പൗരന്മാരാണെന്ന് തെളിയിക്കുന്ന രേഖകൾ ഞങ്ങളുടെ പക്കലുണ്ട്. ഞങ്ങളെ കൊന്ന് നദിയിൽ തള്ളിയാലും ഞങ്ങൾ ഇന്ത്യയിലേക്ക് പോകില്ല,” അദ്ദേഹം പറഞ്ഞു.
ഇവരെ പ്രവേശിപ്പിക്കാൻ ബംഗ്ലാദേശ് അതിർത്തി രക്ഷാ സേന തയ്യാറാകാതെ വന്നതോടെ ഇവർ കരയുന്നതും വീഡിയോയിൽ കാണാം. ഇന്ത്യൻ അതിർത്തി കടക്കാൻ ശ്രമിച്ച നിരവധി ബംഗ്ലാദേശി പൗരന്മാരെ ബിഎസ്എഫ് അടുത്തിടെ പിന്തിരിപ്പിച്ചിരുന്നു. കഴിഞ്ഞ ഒരാഴ്ചയ്ക്കിടെ, അസം പോലീസും ബിഎസ്എഫും ചേർന്ന് 21 നുഴഞ്ഞുകയറ്റക്കാരെ തടഞ്ഞു. നുഴഞ്ഞുകയറ്റം തടയുന്നതിൽ പോലീസും ബിഎസ്എഫും വഹിക്കുന്ന പങ്കിനെ മുഖ്യമന്ത്രി ഹിമന്ത ബിശ്വ ശർമ്മ പ്രശംസിച്ചു.
