തിരുവനന്തപുരം: താരസംഘടനയായ അമ്മയിലെ ആഭ്യന്തര പ്രശ്നങ്ങളിൽ ഇടപെടാനില്ലെന്ന് മോഹൻലാൽ. പ്രശ്നങ്ങൾ ഭാരവാഹികൾ തമ്മിൽ തീർക്കട്ടേയെന്നും അമ്മയുടെ തലപ്പത്തേക്ക് ഇനിയില്ലെന്നും മോഹൻലാൽ പറഞ്ഞു. മകൾ വിസ്മയ നായികയായി എത്തുന്ന പുതിയ ചിത്രം തുടക്കത്തിൻ്റെ പ്രമോഷൻ പരിപാടികളിൽ പങ്കെടുത്ത് സംസാരിക്കുമ്പോൾ ആണ് താരം ഇക്കാര്യം പറഞ്ഞത്.
മക്കളെ തുല്യതയോടെ കണ്ട് ഇടപെടുന്നതിനെപ്പറ്റിയും പ്രമോഷൻ അഭിമുഖങ്ങളിൽ മോഹൻലാൽ വാചാലനായി.
‘ഞാനൊരു ഫ്രീ തിങ്കർ ആണ്. ഞാൻ എന്നെ റെസ്പെക്ട് ചെയ്യുന്ന പോലെ മറ്റുള്ളവരെയും ബഹുമാനിക്കുന്ന ആളാണ്. ഈ കുട്ടികൾ നമുക്ക് ഒരു പ്രശ്നവും ഉണ്ടാക്കിയിട്ടില്ല. കാര്യം മിക്കവാറും അവർ വീട്ടിലില്ല. കൊച്ചിലേ അവർ ഹോസ്റ്റലിൽ പഠിച്ചതാണ്. അവരുടേതായ കാഴ്ചപ്പാടുകളുണ്ട്, വ്യക്തിത്വമുണ്ട്. വേറെ ആളുകളുടെ കാര്യത്തിലൊന്നും ഇടപെടുന്നില്ല. അപ്പോൾ അവരെ ഗൈഡ് ചെയ്യേണ്ട കാര്യമില്ല. അവരുടെ ഇഷ്ടത്തിന് നമുക്കും സഞ്ചരിക്കാൻ പറ്റുന്നു, നമ്മുടെ ഇഷ്ടത്തിന് അവർക്കും സഞ്ചരിക്കാൻ പറ്റുന്നു. ഞാൻ എന്റെ കൂടെയുള്ള എല്ലാവരുമായി അങ്ങനെയാണ്. ആവശ്യമില്ലാത്ത കാര്യങ്ങളിൽ ഇടപെടാറില്ല. അതുപോലെ എന്റെ ആവശ്യമില്ലാത്ത കാര്യങ്ങളിലും ആരും ഇടപെടാൻ പാടില്ല. ഇടപെട്ടാലും എനിക്ക് കുഴപ്പമൊന്നുമില്ല’.
