ഗൾഫിലെ ഭാഗ്യവാൻമാർ മലയാളികളാണെന്ന് വീണ്ടും തെളിയിച്ചിരിക്കുകയാണ് അബുദാബി ബിഗ് ടിക്കറ്റിന്റെ 244-ാം സീരീസ് ‘മൈറ്റി – 20 മില്യന്’ നറുക്കെടുപ്പിലൂടെ. ഇക്കുറി 44 കോടിയുടെ ഭാഗ്യം തേടിയെത്തിയത് പ്രവാസി മലയാളിയായ പ്രദീപ് കെ പിക്ക്. ദുബായില് താമസിക്കുന്ന ഇദ്ദേഹം സെപ്തംബര് 13ന് വാങ്ങിയ 064141 നമ്പര് ടിക്കറ്റാണ് വന്തുകയുടെ സമ്മാനം നേടിയത്.
ഇന്ത്യക്കാരനായ അബ്ദുല് ഖാദര് ഡാനിഷ് ആണ് രണ്ടാം സമ്മാനമായ 10 ലക്ഷം ദിര്ഹം സ്വന്തമാക്കിയത്. ഇദ്ദേഹം വാങ്ങിയ 252203 എന്ന ടിക്കറ്റിനാണ് സമ്മാനം. മൂന്നാം സമ്മാനമായ 100,000 ദിര്ഹം സ്വന്തമാക്കിയത് ഇന്ത്യക്കാരനായ ആലമ്പറമ്പില് അബൂ ഷംസുദ്ദീനാണ്. 201861 എന്ന ടിക്കറ്റ് നമ്പരാണ് സമ്മാനാര്ഹമായത്. 064378 എന്ന ടിക്കറ്റ് നമ്പരിലൂടെ ഇന്ത്യയില് നിന്നുള്ള മനോജ് മരിയ ജോസഫ് ഇരുത്തയം 50,000 ദിര്ഹത്തിന്റെ നാലാം സമ്മാനം സ്വന്തമാക്കി.
ഇത്തവണ ബിഗ് ടിക്കറ്റ് നറുക്കെടുപ്പിലെ എല്ലാ സമ്മാനങ്ങളും ഇന്ത്യക്കാര് നേടിയെന്ന പ്രത്യേകത കൂടിയുണ്ട്. ജീപ്പ് ഗ്രാന്റ് ചെറോക് സീരീസ് എട്ട് സ്വന്തമാക്കിയ രണ്ടുപേരും ഇന്ത്യക്കാരാണ്. 010952 എന്ന ടിക്കറ്റ് നമ്പരിലൂടെ ഷാജി പുതിയ വീട്ടിലും നാരായണന് പുതിയ വീട്ടിലും, 016090 എന്ന ടിക്കറ്റ് നമ്പരിലൂടെ മുഹമ്മദ് അലി പാറത്തൊടി എന്നിവരാണ് വിജയികളായത്.
