ഇടുക്കിയില് ആനച്ചാലിന് സമീപം ആമക്കണ്ടത്ത് ആറ് വയസുകാരനെ ചുറ്റിക കൊണ്ട് തലയ്ക്ക് അടിച്ച് കൊല്ലുകയും 14 വയസുള്ള പെണ്കുട്ടിയെ പീഡിപ്പിക്കുകയും ചെയ്ത കേസില് പ്രതിയ്ക്ക് വധ ശിക്ഷ. ഇടുക്കി ഫാസ്റ്റ്ട്രാക്ക് കോടതിയുടെതാണ് വിധി.
മരണം വരെയാണ് പ്രതിക്ക് വധശിക്ഷ വിധിച്ചത്. ആകെ 92 വര്ഷമാണ് തടവ് ശിക്ഷ. ആനച്ചാല് ആമക്കണ്ടം സ്വദേശിയായ ആറ് വയസുകാരന്റെ സഹോദരിയെയാണ് ഇയാള് പീഡിപ്പിച്ചത്.
കുട്ടികളുടെ അമ്മയുടെ സഹോദരിയുടെ ഭര്ത്താവാണ് പ്രതി. കുട്ടികളുടെ അമ്മയെയും മുത്തശ്ശിയെയും ചുറ്റിക കൊണ്ട് തലയ്ക്കടിച്ച് കൊലപ്പെടുത്താന് ശ്രമിച്ചിരുന്നു. ഇതിന് ശേഷം പ്രതി 14 വയസുകാരിയായ പെണ്കുട്ടിയെ ഏലത്തോട്ടത്തില് വെച്ച് ബലാത്സംഗം ചെയ്യുകയായിരുന്നു.
കുട്ടിയെ കൊലപ്പെടുത്തിയതിന് വകുപ്പ് 302 പ്രകാരം പ്രതിയെ മരണം വരെ വധശിക്ഷയ്ക്ക് വിധിച്ചു. ബലാത്സംഗം ചെയ്ത കുറ്റത്തിന് പോക്സോ പ്രകാരം നാല് വകുപ്പുകള് ആണ് ചുമത്തിയിരിക്കുന്നത്. ഇത് പ്രകാരം മരണം വരെ ജീവപര്യന്തമാണ് വിധിച്ചിരിക്കുന്നതെന്ന് വിധിയ്ക്ക് ശേഷം പ്രോസിക്യൂഷന് മാധ്യമങ്ങളോട് പറഞ്ഞു. വിവിധ വകുപ്പുകളിലായി 92 വര്ഷം തടവും പിഴയുമാണ് ഈടാക്കിയിട്ടുള്ളത്. പിഴ അടച്ചില്ലെങ്കില് 11 വര്ഷം കൂടി അഡീഷണല് ആയി തടവ് അനുഭവിക്കേണ്ടിവരും.
പ്രതിയ്ക്ക് വധശിക്ഷ തന്നെ നല്കണമെന്ന് പ്രോസിക്യൂഷന് ആവശ്യപ്പെട്ടിരുന്നു. 2021 ഒക്ടോബര് രണ്ടിന് രാത്രിയാണ് സംഭവം നടന്നത്. വെള്ളത്തൂവല് പൊലീസാണ് കേസില് കുറ്റപത്രം സമര്പ്പിച്ചത്.
