അബുദാബി: യുഎഇയിൽ റബീഉൽ അവ്വൽ മാസപ്പിറവി ദൃശ്യമായതോടെ നബിദിനം പ്രമാണിച്ചുള്ള പൊതുഅവധി തീയതികൾ പ്രഖ്യാപിച്ചു. ആഗസ്റ്റ് 14 റബീഉൽ അവ്വൽ ഒന്നായി ആരംഭിച്ചതോടെ, ഹിജ്റ കലണ്ടർ പ്രകാരം റബീഉൽ അവ്വൽ 12ന് വരുന്ന നബിദിനം ആഗസ്റ്റ് 25 ചൊവ്വാഴ്ചയാണ്.
എങ്കിലും, രാജ്യത്തെ വാരാന്ത്യ അവധി കൈമാറ്റ നയം അനുസരിച്ച് അവധി വെള്ളി ദിവസത്തേക്ക് മാറ്റിയതോടെ യുഎഇയിലെ ജീവനക്കാർക്ക് തുടർച്ചയായ മൂന്ന് ദിവസത്തെ നീണ്ട വാരാന്ത്യ അവധി ലഭിക്കും. ഈ വർഷത്തെ നബിദിന അവധിയുമായി ബന്ധപ്പെട്ട് പൊതു-സ്വകാര്യ മേഖലകൾക്ക് ആഗസ്റ്റ് 28 വെള്ളിയാഴ്ച അവധിയായിരിക്കുമെന്ന് യുഎഇ സർക്കാർ കഴിഞ്ഞ ആഴ്ച പ്രഖ്യാപിച്ചിരുന്നു.
ശനി, ഞായർ ദിവസങ്ങളിൽ സാധാരണ വാരാന്ത്യ അവധിയുള്ള ജീവനക്കാർക്ക് ഇതോടെ മൂന്ന് ദിവസം തുടർച്ചയായി അവധി ലഭിക്കും. ദുബായ് സർക്കാർ ജീവനക്കാർക്കും ആഗസ്റ്റ് 28 ഒഫീഷ്യൽ അവധിയായിരിക്കുമെന്ന് ദുബായ് ഗവൺമെൻറ് ഹ്യൂമൻ റിസോഴ്സ് ഡിപ്പാർട്ട്മെന്റ് അറിയിച്ചിട്ടുണ്ട്. 2025ൽ പ്രാബല്യത്തിൽ വന്ന പുതിയ നിയമമനുസരിച്ച്, ഈദുൽ ഫിത്ർ, ഈദുൽ അദ്ഹ എന്നീ പെരുന്നാൾ അവധികൾ ഒഴികെയുള്ള മറ്റ് പൊതുഅവധികൾ പ്രവൃത്തിദിവസങ്ങളിലാണ് വരുന്നതെങ്കിൽ, അവ വാരാന്ത്യത്തിന്റെ ആരംഭത്തിലേക്കോ അവസാനത്തിലേക്കോ മാറ്റാൻ വ്യവസ്ഥയുണ്ട്.
