ദളിത് വിഭാഗത്തില് നിന്നുള്ള ദ്രൗപതി മുര്മുവിനെ എന്.ഡി.എ സര്ക്കാര് രാഷ്ട്രപതിയാക്കിയത് തെരഞ്ഞെടുപ്പില് നേട്ടമുണ്ടാക്കാനാണെന്ന് ഇന്ത്യന് നാഷണല് കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ. പാര്ലമെന്റ് ഉദ്ഘാടന ചടങ്ങിലേക്ക് രാഷ്ട്രപതി ദ്രൗപതി മുര്മുവിനെ ക്ഷണിക്കാത്തതില് പ്രതിഷേധിച്ചാണ് ഖാര്ഗെയുടെ വിമര്ശനം.
മുന് രാഷ്ട്രപതി രാം നാഥ് കോവിന്ദിനെയും പാര്ലമെന്റ് ഉദ്ഘാടന ചടങ്ങിലേക്ക് ക്ഷണിച്ചിട്ടില്ല. ഭരണഘടനാപരമായ രീതികളോട് ബിജെപി സര്ക്കാര് നിരന്തരമായി അനാദരവ് കാണിക്കുകയാണ്. ബി.ജെ.പി ആര്.എസ്.എസ് സര്ക്കാരുകള്ക്ക് കീഴില് രാഷ്ട്രപതിയുടെ ഓഫീസ് നോക്കുകുത്തിയായി എന്നും ഖാര്ഗെ വിമര്ശിച്ചു.
രാഷ്ട്രപതി സര്ക്കാരിന്റെ മാത്രമല്ല, പ്രതിപക്ഷത്തിന്റെയും, ഓരോ പൗരന്റെയും പ്രതിനിധിയാണെന്നും മല്ലികാര്ജുന് ഖാര്ഗെ പറഞ്ഞു.
പുതിയ പാര്ലമെന്റ് മന്ദിരം പ്രധാനമന്ത്രി ഉദ്ഘാടനം ചെയ്യുന്നതിനെതിരെ വലിയ രീതിയിലുള്ള പ്രതിഷേധം ഇതിനകം തന്നെ ഉയര്ന്ന് വന്നിരുന്നു. ലോക്സഭാ സെക്രട്ടറിയേറ്റിന്റെ അറിയിപ്പ് പ്രകാരം സവര്ക്കറുടെ ജന്മദിനമായ മെയ് 28നാണ് പുതിയ പാര്ലമെന്റ് മന്ദിരം ഉദ്ഘാടനം ചെയ്യുന്നത്.
