വിദേശ രാജ്യങ്ങളിൽനിന്ന് 10,000 ദിർഹത്തെക്കാൾ മൂല്യമുള്ള ഉൽപന്നങ്ങൾ ഇറക്കുമതി ചെയ്യുന്നതിന് യുഎഇ അറ്റസ്റ്റേഷൻ നിർബന്ധമാക്കി. 150 ദിർഹമാണ് ഒരു വാണിജ്യ ഇൻവോയ്സിന് ഈടാക്കുന്ന അറ്റസ്റ്റേഷൻ ഫീസ്. കൂടാതെ ഇറക്കുമതി ചെയ്യുന്നതിന് 14 ദിവസത്തിനുള്ളിൽ ഇൻവോയ്സ് സാക്ഷ്യപ്പെടുത്തണമെന്നും യുഎഇ വിദേശകാര്യ- രാജ്യാന്തര സഹകരണ മന്ത്രാലയം അറിയിച്ചു.
ഓൺലൈൻ വഴിയായിരിക്കും അറ്റസ്റ്റേഷൻ നൽകുക. അതേസമയം നിയമം ലംഘിക്കുന്ന സ്ഥാപനങ്ങൾക്ക് ഇൻവോയ്സ് ഒന്നിന് 500 ദിർഹം വീതം പിഴ ചുമത്തുമെന്നും അധികൃതർ വ്യക്തമാക്കി. ഓൺലൈൻ അറ്റസ്റ്റേഷൻ ലഭിക്കുന്നതിനായി വിദേശകാര്യ മന്ത്രാലയം തയ്യാറാക്കിയിട്ടുള്ള പോർട്ടലിൽ ഇൻവോയ്സിന്റെ പിഡിഎഫ് അപ് ലോഡ് ചെയ്തതിന് ശേഷം ഫീസ് അടയ്ക്കുമ്പോൾ അപേക്ഷകന് റഫറൻസ് നമ്പർ ലഭിക്കും. ഈ നമ്പർ യുഎഇ കസ്റ്റംസുമായി ബന്ധിപ്പിക്കുന്നതിനാൽ അറ്റസ്റ്റ് ചെയ്യാതെ ഇറക്കുമതി ചെയ്യാൻ സാധിക്കില്ല.
ഇളവുകൾ നൽകുന്ന വിഭാഗങ്ങൾ
വ്യക്തിഗത ഇറക്കുമതി, ഗൾഫ് സഹകരണ കൗൺസിൽ രാജ്യങ്ങളിൽനിന്ന് ഇറക്കുമതി, ഫ്രീ സോണുകളിലേക്ക് കൊണ്ടുവരുന്ന വസ്തുക്കൾ എന്നിവയ്ക്ക് ഇളവുകൾ ലഭിക്കും. യുഎഇ വഴി മറ്റൊരു രാജ്യത്തേക്കു കൊണ്ടുപോകുന്ന ചരക്കുകൾക്കും (ട്രാൻസിറ്റ് ഗുഡ്സ്), ഇ-കൊമേഴ്സ്, നയതന്ത്ര സ്ഥാപനങ്ങൾ, പൊലീസ്, മിലിറ്ററി, ചാരിറ്റബിൾ സൊസൈറ്റികൾ, രാജ്യാന്തര സംഘടനകൾ എന്നിവയുടെ ഇറക്കുമതികൾക്കും ഇളവുകളുണ്ട്.
