അൽ ഐൻ: ഭക്ഷ്യവസ്തുക്കൾ വൃത്തിഹീനമായ സാഹചര്യത്തിൽ സൂക്ഷിച്ച ഹോട്ടൽ അടപ്പിച്ച് അബുദാബി അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റി. അൽ ഐൻ ലത്തീഫ സ്ട്രീറ്റിൽ പ്രവർത്തിച്ചു വന്ന ഹോളോ മീറ്റ് എന്ന റസ്റ്ററന്‍റാണ് അടപ്പിച്ചത്. മുൻപ് നടത്തിയ പരിശോധനകളിൽ ഹോട്ടൽ മാനേജ്മെന്‍റിന് അധികൃതർ മുന്നറിയിപ്പ് നൽകിയിരുന്നു. എന്നാൽ ഇത് പാലിക്കാതിരുന്ന സാഹചര്യത്തിലാണ് നടപടി.
ഹോട്ടൽ വൃത്തിഹീനമായ സാഹചര്യത്തിലാണ് ഭക്ഷണം പാകം ചെയ്തിരുന്നതെന്നും പൊതുജന ആരോഗ്യത്തിന് ഇത് ഭീഷണിയാകുന്നതും കണക്കിലെടുത്താണ് നടപടി. ഇതിന് മുൻപ് നടത്തിയ പരിശോധനകളിൽ മൂന്ന് തവണ സ്ഥാപനത്തിന് അധികൃതർ നോട്ടീസ് നൽകിയിരുന്നു. ഇറച്ചിയുൾപ്പെടെയുള്ള ഭക്ഷ്യവസ്തുക്കൾ വൃത്തിഹീനമായ സാഹചര്യത്തിൽ സൂക്ഷിച്ചതായി ഉദ്യോഗസ്ഥർ കണ്ടെത്തി.
ഉദ്യോഗസ്ഥർ ചൂണ്ടിക്കാട്ടിയ നിർദേശങ്ങൾ പരിഗണിച്ച് ഹോട്ടൽ ഉടൻ തന്നെ തുറക്കാനുള്ള നടപടി സ്വീകരിക്കുമെന്ന് ഹോട്ടൽ അധികൃതർ വ്യക്തമാക്കി. എമിറേറ്റിലെ ഭക്ഷ്യ സുരക്ഷ ഉറപ്പാക്കുന്നതിന് വേണ്ടി തുടർച്ചയായി ഉദ്യോഗസ്ഥരുടെ നേതൃത്വത്തിൽ പരിശോദനകൾ നടത്താറുണ്ട്. പൊതുജനാരോഗ്യത്തിന് ഭീഷണിയായി പ്രവർത്തിക്കുന്ന സ്ഥാപനങ്ങൾ ശ്രദ്ധയിൽപെട്ടാൽ വിളിച്ച് അറിയിക്കണമെന്ന് അധികൃതർ അറിയിച്ചു
