തണ്ണീര്ക്കൊമ്പന്റെ ജഡത്തിന് മുന്നില് നിന്ന് ഫോട്ടോയെടുത്ത വനംവകുപ്പ് ഉദ്യോഗസ്ഥര്ക്കെതിരെ പരാതി. മാനന്തവാടിയില് ജനവാസമേഖലയിലിറങ്ങിയ കാട്ടാനയെ മയക്കുവെടി വെച്ച് ബന്ദിപ്പൂരിലേക്ക് കൊണ്ടുപോകുന്നതിനിടെ ചരിഞ്ഞ ആനയ്ക്കൊപ്പം നിന്ന് ഫോട്ടോഷൂട്ട് നടത്തിയെന്ന് ആരോപിച്ച് ആനിമല് ലീഗല് ഫോഴ്സാണ് പരാതി നല്കിയിരിക്കുന്നത്.
വൈല്ഡ് ലൈഫ് ക്രൈം കണ്ട്രോള് ബ്യൂറോയ്ക്കാണ് പരാതി നല്കിയത്. ജഡത്തിനൊപ്പം ഫോട്ടോ എടുത്ത 14 ജീവനക്കാരെ വന്യജീവി സംരക്ഷണ നിയമപ്രകാരം അറസ്റ്റ് ചെയ്ത് വിചാരണ ചെയ്യണമെന്നാണ് ആവശ്യമെന്നും ആനിമല് ലീഗല് ഫോഴ്സ് ജനറല് സെക്രട്ടറി എയ്ഞ്ചല്സ് നായര് നല്കിയ പരാതി ആവശ്യപ്പെടുന്നു.
പ്രാകൃതവും കിരാതവുമായ നടപടിയിലൂടെ ജഡത്തെ അവഹേളിക്കുകയും അനാദരവ് കാണിക്കുകയുമാണ് ചെയ്തതെന്നും എയ്ഞ്ചല് നായര് പറഞ്ഞു. വന്യജീവികളുടെ ജഡമോ ഭാഗമോ സ്വന്തം ധീരതയും ധൈര്യവും വെളിപ്പെടുത്തുക എന്ന ഉദ്ദേശത്തോടെ സാമൂഹിക മാധ്യമങ്ങളില് പങ്കുവെക്കുന്നത് വന്യജീവികളെ വേട്ടയാടുന്നത് പ്രോത്സാഹിപ്പിക്കുന്നതാണെന്നും അങ്ങനെ ചെയ്യുന്ന പ്രവൃത്തിയെ വന്യജീവി സംരക്ഷണ നിയമത്തിലെ വോട്ടയാടല് പരിധിയില് ഉള്പ്പെടുത്തണമെന്നുമാണ് വനം മന്ത്രാലയത്തിന്റെ ഉത്തരവില് പറയുന്നത്. മൂന്നുമുതല് ഏഴ് വര്ഷം വരെ ശിക്ഷ കിട്ടാവുന്ന കുറ്റമാണ് ഇവര് ചെയ്തതെന്നും പരാതിയില് ചൂണ്ടിക്കാട്ടുന്നു.
