സാര്വ്വലൗകിക ഐക്യത്തിനായി അബുദാബിയില് പുതുതായി പണികഴിപ്പിച്ച ബിഎപിഎസ് ഹിന്ദു ക്ഷേത്രത്തില് വേദ പ്രാര്ത്ഥന. ക്ഷേത്രത്തിന്റെ ഉദ്ഘാടനത്തിന് മുന്നോടിയായി ഫെബ്രുവരി 11 ഞായറാഴ്ചയാണ് 980 പേര് പങ്കെടുത്ത പ്രാര്ത്ഥനയായ വിശ്വ സംഹിത യാഗം നടന്നത്.
ദൈവത്തില് നിന്ന് അനുഗ്രഹം ലഭിക്കുന്നതിനായി ഉച്ഛരിക്കുന്ന ശക്തമായ ദൈവിക പ്രാര്ത്ഥനയാണ് യാഗം എന്ന് ഹിന്ദു പുരാണങ്ങളില് പറയുന്നുണ്ട്. യുഎഇയിലെയും ലോകമെമ്പാടുമുള്ള എല്ലാ മനുഷ്യരുടെയും നന്മയ്ക്കും വിജയത്തിനുമായാണ് ആത്മീയ നേതാക്കളും ഹിന്ദുമതവിഭാഗത്തിലെയും ആളുകള് ചേര്ന്ന് പ്രാര്ത്ഥന നടത്തിയത്. മിഡില് ഈസ്റ്റില് ആദ്യമായാണ് ഇത്രയും വലിയ പ്രാര്ത്ഥന നടക്കുന്നത്.
പുരാതനമായ ചടങ്ങുകള് നടത്തുന്നതിനായി ഏഴ് വിദഗ്ധരായ പൂജാരിമാരാണ് ഇന്ത്യയില് നിന്ന് യുഎഇയിലേക്കെത്തിയത്. അവര്ക്കൊപ്പം 200ഓളം വിശ്വാസികളും ചടങ്ങുകളുടെ നടത്തിപ്പിനായി എത്തി.
ഇന്ത്യയ്ക്ക് പുറത്ത് ഇത്രയും പ്രാധാന്യത്തോടെ യാഗം നടത്തുന്നത് വളരെ അപൂര്വ്വമായാണ്. സാര്വ്വലൗകിക ഐക്യമെന്ന ക്ഷേത്രത്തിന്റെ സന്ദേശം ആളുകളിലേക്ക് എത്തിക്കുന്നതിന് ഈ ചടങ്ങ് ഏറെ സഹായകമായി എന്ന് മഹന്ത് സ്വാമി മഹാരാജിന്റെ നേതൃത്വത്തില് ക്ഷേത്രത്തിന്റെ നിര്മാണ പ്രവര്ത്തനങ്ങള് ഏകോപിപ്പിച്ച സ്വാമി ബ്രഹ്മവിഹരിദാസ് പറഞ്ഞു.
