തിരുവനന്തപുരം: കനത്ത ചൂടിന് പിന്നാലെ സംസ്ഥാനത്ത് അൾട്രാ വയലറ്റ് വികിരണം ശക്തമായതോടെ ജനങ്ങൾക്ക് ജാഗ്രതാ നിർദേശം നൽകി സംസ്ഥാന ദുരന്തനിവാരണ അതോറിറ്റി.
പത്തനംതിട്ട, ആലപ്പുഴ, കോട്ടയം, ഇടുക്കി, കൊല്ലം, പാലക്കാട് എന്നീ ജില്ലകളിലെ വിവിധ പ്രദേശങ്ങളിൽ ഇന്ന് അതോറിറ്റി കനത്ത ചൂടിൽ ജാഗ്രത പാലിക്കണമെന്ന് കാണിച്ച് ഓറഞ്ച് അലർട്ട് പുറപ്പെടുവിച്ചിട്ടുണ്ട്. ഈ മേഖലകളിൽ സൂര്യപ്രകാശം നേരിട്ട് ഏൽക്കുന്നത് ആരോഗ്യപ്രശ്നങ്ങൾക്ക് കാരണമായേക്കാം.
കൊല്ലം- കൊട്ടാരക്കര, പത്തനംതിട്ട – കോന്നി, ആലപ്പുഴ – ചെങ്ങന്നൂർ, കോട്ടയം – ചങ്ങനാശ്ശേരി, ഇടുക്കി – മൂന്നാർ , പാലക്കാട് – തൃത്താല എന്നിവിടങ്ങളിലാണ് ഓറഞ്ച് അലർട്ടാണ് നൽകിയത്. ഇതുകൂടാതെ എറണാകുളം (കളമശ്ശേരി), തൃശ്ശൂർ (ഒല്ലൂർ), മലപ്പുറം (പൊന്നാനി) എന്നീ ജില്ലകളിലാണ് ഇന്ന് യുവി സൂചിക 7 രേഖപ്പെടുത്തിയത്. ഇവിടെ മഞ്ഞ അലർട്ട് ആണ് നൽകിയിരിക്കുന്നത്. കോഴിക്കോട്, വയനാട് ജില്ലകളിൽ സൂചിക 6 ആണ്. യുവി സൂചിക ഉയരുന്നത് സൂര്യതപം ചർമ്മരോഗങ്ങൾ എന്നിവയ്ക്ക് കാരണമാകും. നിലവിലെ സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്ന് കെഎസ്ഡിഎംഎ അറിയിച്ചു.
