കോട്ടയം: എൻഎസ്എസ് നേതൃത്വത്തിൽ നിന്നും കെബി ഗണേഷ് കുമാർ പുറത്ത്. എന്എസ്എസ് ഡയറക്ടർ ബോർഡിൽ നിന്നുമാണ് ഗണേഷ് കുമാറിനെ നീക്കിയത്. കാലാവധി കഴിഞ്ഞതിനാലാണ് ഗണേഷിനെ നീക്കിയത് എന്നാണ് എൻഎസ്എസ് ജനറൽ സെക്രട്ടറി സുകുമാരാൻ നായരുടെെ വിശദീകരണമെങ്കിലും ഗണേഷ് ഒഴികെയുള്ള കാലാവധി കഴിഞ്ഞ അംഗങ്ങളെ ബോർഡിൽ നിലനിർത്തിയിട്ടുണ്ട്.
അംഗത്വം പുതുക്കി നൽകണമെന്ന് ഗണേഷ് കുമാർ ആവശ്യപ്പെട്ടെങ്കിലും എൻഎസ്എസ് നേതൃത്വം അതിനു തയ്യാറായില്ല. ഗണേഷിനൊപ്പം കാലാവധി കഴിഞ്ഞ മറ്റ് എട്ട് പേർക്കും അംഗത്വം പുതുക്കി നൽകുകയും ചെയ്തു.ഗണേഷ് അധ്യക്ഷനായിരുന്ന പത്തനാപുരം താലൂക്ക് യൂണിയൻ നേരത്തെ പിരിച്ചുവിട്ടിരുന്നു. എന്എസ്എസിനൊപ്പം തന്നെ തുടരുമെന്നും സ്ഥാനമാനങ്ങൾ ആഗ്രഹിച്ചിട്ടില്ലെന്നും കെ ബി ഗണേഷ് കുമാർ മാധ്യമങ്ങളോട് പ്രതികരിച്ചു.
അതേസമയം, ഗണേഷ് കുമാറിനെ പുറത്താക്കിയതല്ലെന്നും കാലാവധി കഴിഞ്ഞപ്പോള് വീണ്ടും എടുത്തില്ലെന്നുമാണ് സുകുമാരൻ നായർ വിശദീകരിക്കുന്നത്. എൻഎസ്എസിന് ജനാധിപത്യം ഉണ്ടെന്ന് ഞങ്ങൾക്ക് ബോധ്യമുണ്ട്. എൻഎസ്എസിൽ അർഹതയുള്ള ഒരുപാട് പേരുണ്ട്. എല്ലാവർക്കും മാറി മാറി കൊടുക്കേണ്ടിവരും. കിട്ടാതിരിക്കുന്ന ആളുകൾക്കും കൊടുക്കേണ്ടിവരുമെന്നും സുകുമാരൻ നായർ പറഞ്ഞു. പത്തനാപുരം താലൂക്ക് യൂണിയനിൽ എന്തെങ്കിലും ക്രമവിരുദ്ധ പ്രവർത്തനം നടന്നെങ്കിൽ അദ്ദേഹം കേസ് കൊടുക്കട്ടെയെന്നും സുകുമാരൻ നായർ കൂട്ടിച്ചേര്ത്തു.
