ഇന്ത്യന്‍ പ്രധാനമന്ത്രി നരേന്ദ്ര മോദിയോട് അമേരിക്കയില്‍ വെച്ച് മനുഷ്യാവകാശത്തെക്കുറിച്ച് ചോദ്യം ചോദിച്ച മാധ്യമ പ്രവര്‍ത്തകയ്‌ക്കെതിരായ സൈബര്‍ ആക്രമണത്തെ അപലപിച്ച് വൈറ്റ് ഹൗസ്. വാള്‍സ്ട്രീറ്റ് ജേര്‍ണലിലെ മാധ്യമ പ്രവര്‍ത്തകയായ സബ്രീന സിദ്ദീഖിയ്ക്കാണ് മോദിയോട് ചോദ്യം ചോദിച്ചതിന്റെ പേരില്‍ സൈബര്‍ ആക്രമണം നേരിട്ടത്.
മാധ്യമപ്രവര്‍ത്തകയ്‌ക്കെതിരായ സൈബര്‍ ആക്രമണം അസ്വീകാര്യവും ജനാധിപത്യ വിരുദ്ധവുമാണെന്ന് വൈറ്റ് ഹൗസ് പ്രസ്താവനയില്‍ പ്രതികരിച്ചു. മാധ്യമപ്രവര്‍ത്തകര്‍ക്ക് നേരെ ഉണ്ടാകുന്ന എല്ലാ തരം പീഡനങ്ങളെയും അപലപിക്കുന്നു. ജനാധിപത്യ തത്വങ്ങള്‍ക്കെതിരാണെന്നും ദേശീയ സുരക്ഷ കൗണ്‍സിലിലെ സ്ട്രാറ്റിജിക് കമ്യൂണിക്കേഷന്‍സ് കോര്‍ഡിനേറ്റര്‍ ജോണ്‍ കിര്‍ബി പറഞ്ഞു.
മോദിയും അമേരിക്കന്‍ പ്രസിഡന്റ് ജോ ബൈഡനും സംയുക്തമായി നടത്തിയ വാര്‍ത്താസമ്മേളനത്തിനിടെയാണ് മാധ്യമപ്രവര്‍ത്തക ചോദ്യം ചോദിച്ചത്.
ഇന്ത്യയിലെ മുസ്ലീങ്ങളെയും മറ്റു ന്യൂനപക്ഷങ്ങളെയും അവകാശങ്ങള്‍ മെച്ചപ്പെടുത്താന്‍ സര്‍ക്കാര്‍ എന്താണ് ചെയ്തതെന്നായിരുന്നു ചോദ്യം.
ജനാധിപത്യം തങ്ങളുടെ സിരകളില്‍ ഓടുന്നു, മതത്തിന്റെയോ ജാതിയുടെയോ അടിസ്ഥാനത്തിലുള്ള വിവേചനവും ഇന്ത്യയില്‍ ഇല്ലെന്നാണ് ഇതിന് മറുപടിയായി മോദി പററഞ്ഞത്.
എന്നാല്‍ വാര്‍ത്താസമ്മേളനത്തിന് പിന്നാലെയാണ് സബ്രീന സിദ്ദീഖിക്ക് നേരെ ഇന്ത്യയില്‍ നിന്നടക്കം സൈബര്‍ ആക്രമണം ഉണ്ടായത്.
