മാർബർഗ് വൈറസ് പൊട്ടിപ്പുറപ്പെട്ടതിനാൽ ഇക്വറ്റോറിയൽ ഗിനിയയിലേക്കും ടാൻസാനിയയിലേക്കും യാത്ര ചെയ്യുന്നവർക്ക് യുഎഇയുടെ വിദേശകാര്യ, അന്താരാഷ്ട്ര സഹകരണ മന്ത്രാലയം നിർദേശം നൽകി. സ്വന്തം സുരക്ഷയ്ക്കായി ഈ രണ്ട് ആഫ്രിക്കൻ രാജ്യങ്ങളിലേക്കുള്ള യാത്ര മാറ്റിവയ്ക്കണമെന്ന് ട്വിറ്ററിലൂടെ മന്ത്രാലയം പൗരന്മാരോട് അഭ്യർത്ഥിച്ചു.
അതേസമയം ഇരു രാജ്യങ്ങളിലും താമസിക്കുന്നവരോ സന്ദർശിക്കുന്നവരോ ആയ പൗരന്മാരോട് മുൻകരുതലുകൾ എടുക്കാനും മന്ത്രാലയം നിർദേശിച്ചിട്ടുണ്ട്. കൂടാതെ യോഗ്യതയുള്ള അധികാരികൾ നൽകുന്ന സുരക്ഷാ നിർദ്ദേശങ്ങൾ പാലിക്കാനും മന്ത്രാലയം ആഹ്വാനം ചെയ്തിട്ടുണ്ട്. ഇക്വറ്റോറിയൽ ഗിനിയയും ടാൻസാനിയയും എബോളയ്ക്ക് സമാനമായ പകർച്ചവ്യാധിയും മാരകവുമായ രോഗമായ മാർബർഗ് വൈറസിന്റെ പിടിയിലാണ്. വൈറസ് ബാധിച്ച് ഒൻപതോളം പേരാണ് മരണപ്പെട്ടതെന്ന് ലോകാരോഗ്യ സംഘടന (ഡബ്ല്യുഎച്ച്ഒ) നേരത്തെ അറിയിച്ചിരുന്നു.
