കണ്ണൂരില്‍ തെരുവുനായ ആക്രമണത്തില്‍ 11 വയസുകാരന്‍ നിഹാല്‍ നൗഷാദിനെ കണ്ടെത്തുമ്പോള്‍ ശരീരമാസകലം മുറിവുകളുമായി രക്തം വാര്‍ന്ന നിലയില്‍. ആളൊഴിഞ്ഞ വീട്ടുമുറ്റത്ത് കഴിക്കാനെത്തിയപ്പോഴാണ് സംസാര ശേഷിയില്ലാത്ത, ഓട്ടിസം ബാധിതനായ നിഹാലിനെ ഒരു കൂട്ടം തെരുവുനായ്ക്കള്‍ കടിച്ചു കീറിയത്. മുഖവും വയറും നായ്ക്കള്‍ കടിച്ചു കീറിയിരുന്നു.
ഇന്നലെ വൈകിട്ട് അഞ്ച് മണിയോടെയാണ് കുട്ടിയെ കാണാതാകുന്നത്. എട്ടരയ്ക്ക് ശേഷമാണ് കുട്ടിയെ ആളൊഴിഞ്ഞ പറമ്പില്‍ കണ്ടെത്തുന്നത്. പൊലീസും നാട്ടുകാരും ചേര്‍ന്ന് നടത്തിയ പരിശോധനയിലാണ് കുട്ടിയെ അനക്കമില്ലാത്ത നിലയില്‍ കണ്ടെത്തിയത്.
നിഹാലിന്റെ മൃതദേഹം ഇന്ന് സംസ്‌കരിക്കും. തലശ്ശേരി ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിട്ടുള്ള മൃതദേഹം പോസ്റ്റ് മോര്‍ട്ടത്തിന് ശേഷം ബന്ധുക്കള്‍ക്ക് കൈമാറും. വിദേശത്തുള്ള പിതാവ് നൗഷാദ് മരണ വാര്‍ത്ത അറിഞ്ഞ് നാട്ടിലേക്ക് തിരിച്ചു.
അതേസമയം തെരുവുനായ ശല്യത്തില്‍ നടപടിയെടുക്കാത്തതില്‍ പ്രതിഷേധിച്ച് നാട്ടുകാര്‍ പ്രതിഷേധിക്കുന്നുണ്ട്. അക്രമകാരികളായ തെരുവുനായ്ക്കളെ കൊല്ലാന്‍ അനുമതി ആവശ്യപ്പെട്ട് സുപ്രീം കോടതിയെ സമീപിക്കുമെന്ന് കണ്ണൂര്‍ ജില്ല പഞ്ചായത്ത് അറിയിച്ചു.
