അങ്കമാലിയിലെ ഒരു ടെക്സ്റ്റൈല്സ് ഉദ്ഘാടനത്തെ കുറിച്ച് സോഷ്യല് മീഡിയയില് ഉയര്ന്ന പരിഹാസങ്ങള്ക്ക് മറുപടിയുമായി എല്ദോസ് കുന്നപ്പിള്ളി എം.എല്.എ. കുമ്മനടിച്ചത് താനല്ലെന്ന് എംഎല്എ കുറിപ്പില് വിശദീകരിച്ചു. കെട്ടിടത്തിന്റെ മൊത്തം ഉദ്ഘാടകന് മമ്മൂട്ടിയായിരുന്നെങ്കിലും മുകളിലെ ഷോറും ഉദ്ഘാടനം ചെയ്യാന് തന്നോടാണ് ആവശ്യപ്പെട്ടിരുന്നതെന്ന് എം.എല്.എ പറഞ്ഞു. മമ്മൂട്ടി ഇക്കാര്യം മനസിലാക്കാതെ കത്രിക കയ്യിലെടുത്തതാണ്. എം.എല്.എയാണ് ഉദ്ഘാടകനെന്നു കടയുടമ അറിയിച്ചപ്പോള് അദ്ദേഹം കത്രിക തന്റെ നേരെ നീട്ടി. എന്നാല് അദ്ദേഹത്തോട് ഉദ്ഘാടനം നിര്വഹിച്ചോളൂ എന്ന് താന് പറഞ്ഞു. ഇതാണ് അവിടെ സംഭവിച്ചതെന്നും എല്ദോസ് കുന്നപ്പിള്ളി എം.എല്.എ വിശദീകരിച്ചു
കുറിപ്പിന്റെ പൂര്ണരൂപം
കുമ്മനടിച്ചത് ഞാനല്ല, ബഹു. നടന് മമ്മൂട്ടി ആണ്. ഇന്ന് രാവിലെ (11.08.2022) അങ്കമാലി ഓപ്ഷന്സ് ടെക്സ്റ്റൈല്സ് ഉദ്ഘാടനത്തിന് എന്നെ ക്ഷണിച്ചിരുന്നു. കെട്ടിടത്തിന്റെ ഉദ്ഘാടനകന് ബഹു. മമ്മൂട്ടി ആയിരുന്നു. ഉദ്ഘാടന ശേഷം മുകളിലെ ചെറിയ ഷോ റൂം ഉദ്ഘാടനം ചെയ്യുകയെന്നുള്ള ഉത്തരവാദിത്തം എനിക്കായിരുന്നു. ഞാന് ഉദ്ഘാടനത്തിനു തയ്യാറായി നിന്നപ്പോള് അവിടേക്ക് ബഹു. മമ്മൂട്ടി കടന്ന് വരികയും ചെയ്തു. ഈ സമയം ഇതിന്റെ ഉദ്ഘാടകന് എംഎല്എ ആണെന്ന് കടയുടമ പറയുകയും ചെയ്തു. എന്നാല് ബഹു. മമ്മൂട്ടി ഇക്കാര്യം മനസിലാക്കാതെ കത്രിക കയ്യിലെടുത്തു. എംഎല്എയാണ് ഉദ്ഘാടകനെന്നു ഉടമ അറിയിച്ചപ്പോള് അദ്ദേഹം കത്രിക എനിക്കായി നീട്ടി. എന്നാല് ഞാന് അദ്ദേഹത്തോട് ഉദ്ഘാടനം നിര്വഹിച്ചോളൂ എന്ന് പറയുകയും ഞാന് കൈ ഒന്ന് തൊട്ട് കൊള്ളാമെന്ന് പറയുകയും ചെയ്തു. നാട മുറിച്ച ശേഷം അദ്ദേഹത്തോടുള്ള ബഹുമാനാര്ത്ഥം കത്രിക ഞാന് വാങ്ങിനല്കുകയാണ് ചെയ്തത്. ഇതാണ് ഇതിലെ യഥാര്ത്ഥ വസ്തുത. തെറ്റിദ്ധരിപ്പിക്കപ്പെടുന്ന വാര്ത്തകള് നല്കുന്നത് ശരിയായ നടപടിയല്ല. ഇതുമായി ബന്ധപ്പെട്ട് എന്തെങ്കിലും സംശയം ഉള്ളവര് ടെക്സ്റ്റൈല്സ് ഉടമയെയോ ബന്ധപ്പെട്ടവരോടോ ചോദിക്കാവുന്നതാണ്. മാത്രമല്ല ആ ഫ്ലോറിന്റെ ഉദ്ഘാടകന് ഞാനാണെന്ന് അറിയാതെയാണ് ബഹു. മമ്മൂട്ടി കത്രിക എടുത്തത്. കത്രിക തിരിക വാങ്ങിക്കുന്നത് അദ്ദേഹത്തെ പരിഹസിക്കുന്നതിനു തുല്യമാകുമെന്ന് കരുതിയാണ് ഞാന് അതിനു മുതിരാതിരുന്നത്. ഇക്കാര്യങ്ങള് ഒന്ന് മനസിലാക്കിയാല് കൊള്ളാമെന്നാണ് ഈ ലേഖകനോട് എനിക്ക് സൂചിപ്പിക്കാനുള്ളത്.
