എലിസബത്ത് രാജ്ഞിയുടെ വിയോഗം കോമൺ‌വെൽത്ത് ചരിത്രത്തിലെ ഏറ്റവും ദൈർഘ്യമേറിയ ഒരു രാജവാഴ്ചയുടെ അന്ത്യം കുറിക്കുകയാണ്. അതോടൊപ്പം പുതിയൊരു രാജഭരണത്തിന്റെ തുടക്കത്തിനും. കനേഡിയൻ ഭരണകൂടത്തെ സംബന്ധിച്ചിടത്തോളം ഇനി ഏറെ നിർണായകമായ ദിനങ്ങളാണ് വരാനിരിക്കുന്നത്. കാരണം കനേഡിയൻ ഭരണഘടനയനുസരിച്ച് എലിസബത്ത് രാജ്ഞി കോമൺവെൽത്തിൽ ഉൾപ്പെടുന്ന രാജ്യമായ കാനഡയുടെ കൂടെ രാജ്ഞിയാണ്.
രാജ്ഞിയുടെ മരണത്തോടെ, കാനഡയിൽ എന്തെല്ലാം മാറ്റങ്ങളാണ് സംഭവിക്കുക?
വരാനിരിക്കുന്ന 12 ദിവസങ്ങൾ എല്ലാ കോമൺ‌വെൽത്ത് പൗരന്മാർക്കും ഉള്ളതുപോലെ കനേഡിയൻ‌മാർ‌ക്കും വിലാപ കാലഘട്ടമായിരിക്കും എന്ന് പ്രധാനമന്ത്രി ജസ്റ്റിൻ ട്രൂഡോ പ്രഖ്യാപിച്ചു കഴിഞ്ഞു. ഈ സമയത്ത്, ഹൗസ് ഓഫ് കോമൺസിലെയും, സെനറ്റിലെയും മറ്റു ഫെഡറൽ സ്ഥാപനങ്ങളിലെയും കനേഡിയൻ പതാകകൾ രാജ്ഞിയുടെ അന്ത്യകർമങ്ങളുടെ അഥവാ സ്മാരക ശുശ്രൂഷയുടെ ദിവസം സൂര്യാസ്തമയം വരെ പകുതി താഴ്ത്തിക്കെട്ടും. സ്ഥാപനങ്ങളിൽ പ്രദർശിപ്പിച്ചിരിക്കുന്ന രാജ്ഞിയുടെ ഛായാചിത്രങ്ങൾ കറുത്ത റിബൺ കൊണ്ട് പൊതിയും. ഓട്ടോവയിലെ ക്രൈസ്റ്റ് ചർച്ച് കത്തീഡ്രലിൽ രാജ്ഞിക്കായി അനുസ്മരണ സമ്മേളനവും പരേഡും നടക്കും. ഇതുകൂടാതെ കനേഡിയൻ തലസ്ഥാനമായ ഓട്ടോവയിലെ പാർലമെന്റ് ഹില്ലിൽ അനുശോചന പുസ്തകങ്ങൾ തയ്യാറാക്കാനും ധാരണയുണ്ട്. പൊതുജനങ്ങൾക്ക് ഒാൺലൈനിൽ അനുശോചനം രേഖപ്പെടുത്താനായി ഇലക്ട്രോണിക് പുസ്തകങ്ങൾ ലഭ്യമാക്കുമെന്നും അധികൃതർ അറിയിച്ചിട്ടുണ്ട്. സർക്കാർ ഉദ്യോഗസ്ഥർ ഉൾപ്പെടുന്ന പൊതുപരിപാടികളോ ചടങ്ങുകളോ മാറ്റിവെക്കാനും നിർദേശമുണ്ട്.
ദുഃഖാചരണത്തിനു പുറമെ ഭരണഘടനാപരമായ മാറ്റങ്ങളും കാനഡയിൽ നടക്കുമെന്നത് തീർച്ചയാണ്. ഇതിനായി ഫെഡറൽ ഡിപ്പാർട്ട്‌മെന്റുകൾ എത്രകണ്ട് തയാറായിട്ടുണ്ടെന്ന് ഇപ്പോൾ പറയാൻ കഴിയില്ല. രാജ്ഞിയുടെ മരണത്തോടെ ഭരണഘടനയിലെ പല പ്രധാന ശപഥങ്ങളും ഇനി മാറ്റി എഴുതേണ്ടിവരും. രാജ്ഞിയുടെ പേരും ചിത്രവും ശീർഷകവും ഉപയോഗിക്കുന്നതിനാൽ, രാജ്യത്തെ സ്റ്റാമ്പുകൾ, നിയമപരമായ കരാറുകൾ, പൗരത്വ സർട്ടിഫിക്കറ്റുകൾ, പാസ്‌പോർട്ടുകൾ തുടങ്ങിയവയിലും മാറ്റങ്ങളുണ്ടാകും. ഇതുകൂടാതെ സർക്കാർ രേഖകളുടെ തലക്കെട്ടുകളിലും ചില സൈനിക റെജിമെന്റുകളുടെ പേരുകളിലും മാറ്റങ്ങൾ പ്രതീക്ഷിക്കാം. എന്നിരുന്നാലും, രാജ്ഞിയെക്കുറിച്ചുള്ള എല്ലാ പരാമർശങ്ങളും കണ്ടെത്താനും മാറ്റിസ്ഥാപിക്കാനും കുറച്ച് സമയമെടുത്തേക്കാം.
രാജ്ഞിയുടെ മുഖം ഫീച്ചർ ചെയ്ത കനേഡിയൻ കറൻസി മാറുമോ?
നിലവിൽ 20 ഡോളർ ബില്ലിലും ചില നാണയങ്ങളിലുമാണ് എലിസബത്ത് രാജ്ഞിയെ ഫീച്ചർ ചെയ്തിട്ടുള്ളത്. കാനഡ ഗവൺമെന്റ് പുറത്തിറക്കിയ എല്ലാ നാണയങ്ങളും ഒരു പുതിയ രാജാവിന്റെ കിരീടധാരണം പരിഗണിക്കാതെ തന്നെ അവയുടെ നിയമപരമായ ടെൻഡർ നില നിലനിർത്താമെന്നാണ് നേരത്തെയുള്ള വ്യവസ്ത്ഥ. ആയതിനാൽ എലിസബത്ത് രാജ്ഞി ഇനി പരമാധികാരിയല്ലെങ്കിൽ കൂടി നാണയ വിതരണത്തിന് തടസ്സമുണ്ടാകില്ല. എന്നാൽ കാലക്രമേണ രാജാവിന്റെ ഒരു പുതിയ ഛായാചിത്രം അവതരിപ്പിക്കാൻ അവ മാറേണ്ടതുണ്ട് എന്നതിനാൽ ധനകാര്യ വകുപ്പ് വേണ്ട നടപടികൾ കൈക്കൊള്ളുമെന്ന കാര്യത്തിലും സംശയമില്ല.
എലിസബത്ത് രാജ്ഞിയുടെ മരണത്തൊടെ ചാൾസ് രാജകുമാരൻ സ്വയമേവ കാനഡയുടെ രാജാവാകുമെന്നാണ്, ഇ. സ്മിത്ത്, ക്രിസ്റ്റഫർ മക്‌ക്രീറി, ജോനാഥൻ ഷാങ്‌സ് എന്നിവർ ചേർന്ന് തയാറാക്കിയ കാനഡിയൻ ഭരണഘടനയുടെ വിവരണമായ ഡീപ്പ് ക്രൗൺ എന്ന പുസ്തകത്തിൽ വ്യക്തമാക്കുന്നത്. ഗവർണർ ജനറൽ പുറപ്പെടുവിച്ച പ്രവേശന വിളംബരത്തിലൂടെയാണ് ഇത് ഔദ്യോഗികമായി പ്രഖ്യാപിക്കുന്നത്. ഭാവിയിലെ പുതിയ പൗരന്മാർക്ക് അവരുടെ പൗരത്വ ചടങ്ങുകളിൽ രാജ്ഞിക്ക് പകരം ചാൾസ് രാജാവിനോട് കൂറ് പറയേണ്ടിവരും.
ചാൾസ് രാജാവിന്റെ ചിത്രവും പേരും ക്രമേണ കനേഡിയൻ സമൂഹത്തിൽ ഉൾപ്പെടുത്തും. ഡീപ് ക്രൗൺ അനുസരിച്ച്, ഒരു പുതിയ പരമാധികാരിയിലേക്കുള്ള പരിവർത്തനത്തെ പ്രതിഫലിപ്പിക്കുന്നതിനായി അതെല്ലാം അപ്‌ഡേറ്റ് ചെയ്യപ്പെടണം. സമീപഭാവിയിൽ, കാനഡയിലെ രാജാവിനായി ഒരു പുതിയ ഔപചാരിക പദവി സ്വീകരിക്കുന്നതിനൊപ്പം, രാജാവിനായി ഒരു പുതിയ വ്യക്തിഗത കനേഡിയൻ പതാകയും ഉണ്ടായിരിക്കും. ക്വീൻസ് കൗൺസിൽ ഫോർ കാനഡ, കോർട്ട് ഓഫ് ദി ക്വീൻസ് ബെഞ്ച് അല്ലെങ്കിൽ ഗോഡ് സേവ് ദ ക്വീൻ എന്ന ഗാനം തുടങ്ങിയ സന്ദർഭങ്ങളിൽ ക്വീൻ എന്ന വാക്കിന് പകരം കിംഗ് എന്ന വാക്ക് നൽകുന്നതും മറ്റ് മാറ്റങ്ങളിൽ ഉൾപ്പെടുന്നു.
