തിരുവനന്തപുരം: മുന്‍ എക്‌സൈസ് കമ്മീഷണര്‍ എഡിജിപി മഹിപാല്‍ യാദവ് അന്തരിച്ചു. ബ്രെയിന്‍ ട്യൂമര്‍ ബാധിച്ച് ജയ്പൂരിലെ സ്വകാര്യ ആശുപത്രിയിൽ ചികിത്സയിരിക്കുന്നതിനിടെയാണ് മരണം. അസുഖം ഗുരുതരമായതോടെ മഹിപാൽ യാദവിനെ ജന്മനാടായ ജയ്പൂരിലേക്ക് എയ‍ർലിഫ്റ്റ് ചെയ്തിരുന്നു.
നിലവിൽ എഡിജിപി റാങ്കിലുള്ള കേരള കേഡറിലെ സീനിയ‍ർ പൊലീസ് ഓഫീസറായിരുന്നു മഹിപാൽ യാദവ്. വരുന്ന ശനിയാഴ്ച അദ്ദേഹം സർവ്വീസിൽ നിന്നും വിരമിക്കേണ്ടതായിരുന്നു. പൊലീസ് ആസ്ഥാനത്ത് ഔദ്യോഗിക യാത്രയയപ്പ് ഇന്ന് നടക്കാനിരിക്കെയാണ് അന്ത്യം.
1997 ബാച്ച് ഐപിഎസ് ഓഫിസറാണ് മഹിപാൽ യാദവ്. എറണാകുളം ഐ ജി, കേരള ബിവറേജസ് കോര്‍പറേഷന്‍ എംഡി എന്നീ നിലകളില്‍ പ്രവര്‍ത്തിച്ചിട്ടുണ്ട്. 2013ലെ പ്രസിഡന്റിന്റെ വിശിഷ്ട സേവനത്തിനുള്ള പൊലീസ് മെഡല്‍ നേടിയിട്ടുണ്ട്.
