ലോകകപ്പിന് മാച്ച് ടിക്കറ്റ് ബുക്ക് ചെയ്തിരിക്കുന്ന ആരാധകർക്കായി മാച്ച് ടിക്കറ്റ് ആപ്ലിക്കേഷനുമായി ഫിഫ. ഒക്ടോബർ രണ്ടാം വാരത്തോടെ ആപ്ലിക്കേഷൻ പുറത്തിറക്കുമെന്ന് സുപ്രീം കമ്മിറ്റി ഫോർ ഡെലിവറി ആൻഡ് ലെഗസി അറിയിച്ചു. ആപ്പ് ഡൗൺലോഡ് ചെയ്ത ശേഷം മാച്ച് കാർഡുകൾ അപ്ലോഡ് ചെയ്ത് സ്റ്റേഡിയത്തിലേക്ക് പ്രവേശിക്കാം. ടിക്കറ്റ് നമ്പർ ഉപയോഗിച്ച് ടിക്കറ്റ് ഡിജിറ്റൽ ആക്കുകയും ചെയ്യാം. ഹയാ കാർഡിന് പുറമെയാണ് പുതിയ സംവിധാനം.
വിദേശത്ത് നിന്നുള്ള കാണികൾക്ക് രാജ്യത്തേക്കുള്ള പെർമിറ്റായും സൗജന്യ യാത്രാ പെർമിറ്റായുമാണ് ഹയാ കാർഡ് ഉപയോഗിക്കുന്നത്. ഇത് ഖത്തർ അധികൃതരുടെ നിയന്ത്രണത്തിലാണ്. അതേസമയം ലോകകപ്പിലേക്കുള്ള ദിവസങ്ങൾ കുറഞ്ഞു വരുന്ന സാഹചര്യത്തിൽ ഹയാ കാർഡ് സ്വന്തമാക്കാത്തവർ ഉടൻ തന്നെ അപേക്ഷിക്കണമെന്ന് സംഘാടകർ അറിയിച്ചു. ഫൈനൽ ദിനമായ ഡിസംബർ 18 വരെ ടിക്കറ്റുകൾ ലഭ്യമാണ്.
