ക്രിസ്മസ് റിലീസായി തീയേറ്ററുകളിൽ എത്തിയ നിവിൻ പോളി ചിത്രം സർവ്വം മായ ബോക്സ് ഓഫീസിൽ മികച്ച പ്രകടനത്തോടെ തുടരുകയാണ്. കഴിഞ്ഞ ആഴ്ച നൂറ് കോടി ക്ലബിലെത്തിയ ചിത്രം ഈ ആഴ്ച 130 കോടി കളക്ഷനിലേക്ക് എത്തി. ഇതോടെ മലയാളത്തിൽ ഏറ്റവും കൂടുതൽ വരുമാനം നേടിയ പത്ത് മലയാള സിനിമകളുടെ പട്ടികയിലേക്ക് സർവ്വം മായയും എത്തി. നൂറ് കോടി ക്ലബിൽ എത്തുന്ന പതിമൂന്നാമത്തെ മലയാള സിനിമയാണ് സർവ്വം മായ.
പ്രമുഖ ട്രാക്കർമാരായ സാക്നിൽകിൻറെ കണക്ക് പ്രകാരം ആഗോള ബോക്സ് ഓഫീസിൽ നിന്ന് ചിത്രത്തിൻറെ കളക്ഷൻ ഇതുവരെ 130.5 കോടി ആയി. നിലവിൽ ടോപ്പ് ടെൻ കളക്ഷൻ സിനിമകളിൽ പത്താം സ്ഥാനത്താണ് സർവ്വം മായ. 129 കോടി ലൈഫ് ടൈം കളക്ഷൻ ഉള്ള ലൂസിഫറിനെയാണ് ചിത്രം പിന്നിലാക്കിയത്.
മലയാളത്തിൽ നിന്നും 300 കോടി ക്ലബിലെത്തിയ ഏക ചിത്രം ലോക ചാപ്റ്റർ 1 ചന്ദ്രയാണ് കളക്ഷനിൽ ഒന്നാം സ്ഥാനത്തുള്ളത്. മോഹൻലാൽ ചിത്രം എമ്പുരാൻ രണ്ടാം സ്ഥാനത്തുണ്ട്. രണ്ടും 2025-ൽ ഇറങ്ങിയ ചിത്രങ്ങളാണ്. മഞ്ഞുമ്മൽ ബോയ്സാണ് വരുമാനത്തിൽ മൂന്നാം സ്ഥാനത്ത്. തുടരും, 2018, ആടുജീവിതം, ആവേശം, പുലിമുരുകൻ, പ്രേമലു, സർവ്വം മായ എന്നിങ്ങനെയാണ് ആദ്യപത്തിലെ മറ്റു ചിത്രങ്ങൾ.
300 കോടി ക്ലബ്ബിൽ ഇടംപിടിച്ച ഏക ചിത്രം ലോകയാണ്. എമ്പുരാൻ 268 കോടി നേടിയപ്പോൾ മഞ്ഞുമ്മൽ ബോയ്സ് 242 കോടിയും തുടരും 235 കോടിയും നേടി. അഞ്ചാം സ്ഥാനത്തുള്ള 2018, 177 കോടിയും ആറാം സ്ഥാനത്തുള്ള ആടുജീവിതം 158 കോടിയും നേടിയിട്ടുണ്ട്. 156 കോടിയാണ് ആവേശത്തിൻറെ കളക്ഷൻ. പുലിമുരുകൻ 140 കോടിയിലേറെ നേടിയപ്പോൾ പ്രേമലുവിൻറെ ലൈഫ് ടൈം കളക്ഷൻ 136 കോടി ആയിരുന്നു.
