യുഎഇ സെന്ട്രല് ബാങ്ക് പുറത്തിറക്കിയ ആയിരം ദിര്ഹത്തിന്റെ പുതിയ നോട്ടുകള് അടുത്തയാഴ്ച മുതൽ പ്രചാരത്തിലെത്തും. ഏപ്രില് 10 മുതല് ബാങ്കുകള് വഴിയും മണി എക്സ്ചേഞ്ച് ഹൗസുകള് വഴിയും ജനങ്ങള്ക്ക് ലഭ്യമായിത്തുടങ്ങും.
യുഎഇയുടെ 51-ാം ദേശീയ ദിനാഘോഷ വേളയില് പുറത്തിറക്കിയ പുതിയ നോട്ടാണ് പ്രാബല്യത്തില് വരുന്നത്. പുതിയ നോട്ടിൽ രാജ്യത്തിന്റെ ചരിത്രത്തിനൊപ്പം ആണവോര്ജ നിലയവും ബഹിരാകാശ ഗവേഷണവും ഉള്പ്പെടെയുള്ള സമീപകാലത്തെ നേട്ടങ്ങളും ഇടം നേടിയിട്ടുണ്ട്.
യുഎഇ രാഷ്ട്രപിതാവായ ഷെയ്ഖ് സായിദിനൊപ്പം അബുദാബിയിലെ ബറാക ആണവോര്ജ നിലയവും ചൊവ്വാ ഗ്രഹത്തിലെ പര്യവേക്ഷണത്തിനായി യുഎഇ വിക്ഷേപിച്ച ഹോപ്പ് പ്രോബും നോട്ടില് ആലേഖനം ചെയ്യപ്പെട്ടിരിക്കുന്നു. സമീപകാല ചരിത്രത്തില് യുഎഇ കൈവരിച്ച രണ്ട് സുപ്രധാന നേട്ടങ്ങളാണ് ഇവ.
