ആഫ്രിക്കയിലെ ഏറ്റവും ഉയരം കൂടിയ കൊടുമുടിയായ താൻസാനിയയിലെ കിളിമഞ്ചാരോ കീഴടക്കി എമിറാത്തി പെൺകുട്ടി. 13കാരിയായ അയ ഫഖീഹ് ആണ് റെക്കോഡിട്ടത്. കൊടുമുടി കീഴടക്കിയ ഏറ്റവും പ്രായം കുറഞ്ഞ എമിറാത്തിയാണ് അയ. നേരത്തെ കൊടുമുടി കീഴടക്കിയ സൈഫ് എന്നുപേരുള്ള 14കാരന്റെ പേരിലായിരുന്നു റെക്കോർഡ്. അയയുടെ ബന്ധു കൂടിയായ സൈഫിന്റെ റെക്കോർഡാണ് അയ തകർത്തിരിക്കുന്നത്.
അതേസമയം ‘റൂം ടു റീഡ്’ എന്ന വിദ്യഭ്യാസ സംവിധാനത്തെ കുറിച്ചുള്ള ബോധവൽകരണം കൂടി ലക്ഷ്യമിട്ടാണ് അയ ഈ സാഹസിക യാത്ര നടത്തിയത്. യുഎഇയിൽ നിന്ന് പുറപ്പെട്ട അധ്യാപകരായ സ്ത്രീകളുടെ കൂട്ടത്തിലാണ് അയയും യാത്ര പുറപ്പെട്ടത്. പരിചയ സമ്പന്നയായ ഒരു ഗൈഡും ഇവരുടെ കൂടെയുണ്ടായിരുന്നു. പലരും ദൗത്യം പൂർത്തീകരിക്കാൻ കഴിയുമോ എന്ന് സംശയം പ്രകടിപ്പിച്ചിരുന്നു. കൂടാതെ സഹോദരിയുടെയും മാതാവിന്റെയും പിന്തുണ ഉണ്ടായിരുന്നെന്ന് അയ പറഞ്ഞു. ജീവിതത്തിൽ നിർവഹിച്ച ഏറ്റവും കഠിനമായ പ്രവൃത്തിയായിരുന്നു മലകയറ്റമെന്നും അയ കൂട്ടിച്ചേർത്തു. യാത്രയ്ക്കിടെ അയയുടെ കാലിൽ രക്തം കല്ലിക്കുകയും ശ്വാസ തടസം അനുഭവപ്പെടുകയും ചെയ്തിരുന്നു.
