ഇന്ത്യൻ ഡ്രൈവിങ് ലൈസൻസുള്ള ഗോൾഡൻ വീസക്കാർക്ക് യുഎഇയിൽ നേരിട്ട് ലൈസൻസ് ടെസ്റ്റിന് ഹാജരാകാമെന്ന് റോഡ്സ് ആൻഡ് ട്രാൻസ്പോർട്ട് അതോറിറ്റി. ഇന്ത്യയ്ക്ക് പുറമെ യുഎഇ അംഗീകരിച്ച രാജ്യങ്ങളിലെ ഡ്രൈവിംഗ് ലൈസൻസ് ഉളളവർക്കും നേരിട്ട് ടെസ്റ്റിന് ഹാജരാകാൻ അവസരമുണ്ട്.
അബുദാബി ഉൾപ്പെടെയുളള എമിറേറ്റുകളിലും ഇതേ ഇളവുകൾ ലഭ്യമാണ്. ആർടിഎ വെബ്സൈറ്റ് (www.rta.ae)വഴി ഫീസും അടയ്ക്കാനുള്ള സൗകര്യം ഒരുക്കിയിട്ടുണ്ട്. കൂടാതെ റോഡ് ടെസ്റ്റിനുള്ള തീയതി തിരഞ്ഞെടുക്കാനും കഴിയും. മാതൃരാജ്യത്തെ ലൈസൻസിൻ്റെ പകർപ്പും ഹാജരാക്കണം
യുഎഇയിൽ ഡ്രൈവിങ് ലൈസൻസ് നേടണമെങ്കിൽ അംഗീകൃത ഡ്രൈവിങ് ഇൻസ്റ്റിറ്റ്യൂട്ടിൽ ചേർന്ന് തിയറിയും പ്രാക്ടിക്കൽ പരിശീലനവും വിജയിക്കണം. തിയറി, പാർക്കിങ്, റോഡ് ഡ്രൈവ് എന്നിങ്ങനെ മൂന്ന് കടമ്പകളാണ് കടക്കേണ്ടത്. എന്നാൽ ഗോൾഡൻ വീസക്കാർക്ക് തിയറി (ലേണേഴ്സ്), റോഡ് ടെസ്റ്റുകൾ എന്നിവയ്ക്ക് നേരിട്ടു ഹാജരാകാനാകും. ഇവർക്ക് ടെസ്റ്റിനുള്ള തുക മാത്രം അടച്ചാൽ മതിയാകുമെന്നും അതോറിറ്റി അറിയിച്ചു.
