കുടുംബങ്ങൾക്ക് പലതവണ വന്നു പോകാൻ സാധിക്കുന്ന 5 വർഷം കാലാവധിയുള്ള ടൂറിസ്റ്റ് വീസ പ്രഖ്യാപിച്ചിരിക്കുകയാണ് യുഎഇ. കുടുംബത്തെ കൊണ്ടുവരാൻ ടൂറിസ്റ്റ് വീസയ്ക്ക് അപേക്ഷിക്കുന്നവർ ഇനി എല്ലാവരുടെയും വിവരങ്ങൾ ചേർത്ത് ഒറ്റ അപേക്ഷ സമർപ്പിച്ചാൽ മതി. ഇതുവരെ വീസ ആവശ്യമുള്ള ഓരോരുത്തർക്കും പ്രത്യേകം അപേക്ഷ നൽകണമായിരുന്നു
ഒരു അപേക്ഷയിൽ 5 വർഷത്തേക്കുള്ള മൾട്ടിപ്പിൾ എൻട്രി ടൂറിസ്റ്റ് വീസ ലഭിക്കും. ഒരുമിച്ചു യാത്ര ചെയ്യുന്നവർക്കാണ് ഈ സൗകര്യമുള്ളത്. ഫാമിലി ടൂറിസ്റ്റ് വീസയിൽ കുട്ടികൾക്ക് 18 വയസ്സിൽ കൂടുതൽ പാടില്ല. വീസയുള്ളവർക്ക് 3 മാസം വരെ ദുബായിൽ കഴിയാവുന്നതാണ്. കൂടാതെ 6 മാസം വരെ നീട്ടുകയും ചെയ്യാം. ഐഡൻ്റിറ്റി, സിറ്റിസൻഷിപ്, കസ്റ്റംസ് ആൻഡ് പോർട് (ഐസിപി) ആണ് വീസ നൽകുന്നത്. ഐസിപിയുടെ വെബ്സൈറ്റിലെത്തി നേരിട്ട് അപേക്ഷിക്കാം.
അപേക്ഷ നൽകാൻ സ്പോൺസർമാരുടെ ആവശ്യമില്ല. ട്രാവൽ ഏജൻ്റ് മുഖേന ബുക്ക് ചെയ്യാനും കഴിയില്ല. ഓൺലൈനിലൂടെ നേരിട്ട് ഐസിപിയെ സമീപിക്കണം. കുടുംബാംഗങ്ങളെ സന്ദർശിക്കുന്നതിനു മറ്റും സ്ഥിരമായി വന്നു പോകുന്നവർക്ക് ഓരോ തവണയും വീസയ്ക്ക് അപേക്ഷിക്കുന്ന ബുദ്ധിമുട്ട് ഒഴിവാക്കാനും കഴിയും.
വീസ അപേക്ഷ ഇങ്ങനെ :
ഒരാളുടെ വീസയ്ക്ക് 750 ദിർഹം (16700 രൂപ) ചെലവ് വരുമെന്ന് ഐസിപി വെബ്സൈറ്റ് വ്യക്തമാക്കുന്നു. കൂടാതെ സെക്യൂരിറ്റി ഡിപ്പോസിറ്റായി 3,025 ദിർഹവും (68000 രൂപ) അടയ്ക്കേണ്ടി വരും.
ആവശ്യമായ രേഖകൾ:
കളർ ഫോട്ടോ, പാസ്പോർട്ട് കോപ്പി, മെഡിക്കൽ ഇൻഷുറൻസ്, മടക്ക യാത്രാ ടിക്കറ്റ്, 6 മാസത്തെ ബാങ്ക് സ്റ്റേറ്റ്മെൻ്റ്, കുറഞ്ഞത് 14,700 ദിർഹം (3.3 ലക്ഷം രൂപ) ബാങ്ക് ബാലൻസ്, യുഎഇയിൽ താമസിക്കുന്ന സ്ഥലത്തിൻ്റെ തെളിവ് (ഹോട്ടൽ ബുക്കിങ് രേഖയോ താമസിക്കുന്ന വീടിൻ്റെ രേഖയോ) ഇത്രയും ഹാജരാക്കണം.
