യുഎഇയിലെ മാതൃദിനത്തിൽ അമ്മമാർക്കായി പിന്തുണയുടെയും സ്നേഹത്തിന്റെയും മനോഹരമായ സന്ദേശം പങ്കുവച്ച് യുഎഇ പ്രസിഡന്റ്. ട്വിറ്ററിലൂടെയാണ് യുഎഇ പ്രസിഡന്റും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ ആശംസകൾ നേർന്നത്. സ്വന്തം അമ്മയും രാഷ്ട്രമാതാവുമായ ശൈഖ ഫാത്തിമ ബിൻത് മുബാറകിനും ലോകത്തിലെ എല്ലാ അമ്മമാർക്കും അദ്ദേഹം ആശംസകൾ അറിയിച്ചു. യുഎഇയിൽ എല്ലാ വർഷവും മാർച്ച് 21 നാണ് മാതൃദിനമായി ആഘോഷിക്കുന്നത്.
അമ്മമാർ സ്നേഹത്തിന്റെയും ശക്തിയുടെയും പ്രചോദനത്തിന്റെയും അചഞ്ചലമായ ഉറവിടമാണെന്നും അദ്ദേഹം പരാമർശിച്ചു. അമ്മമാർ എല്ലാ ദിവസവും ആഘോഷിക്കപ്പെടുകയും പരിപാലിക്കപ്പെടുകയും ചെയ്യണമെന്നും അദ്ദേഹം കൂട്ടിച്ചേർത്തു. എല്ലാ അമ്മമാരുടെയും ആരോഗ്യത്തിനും സന്തോഷത്തിനും പ്രാർത്ഥിക്കുന്നു. മാതൃദിനാശംസകൾ എന്നും അദ്ദേഹം കുറിച്ചു.
അതേസമയം ജനറൽ വിമൻസ് യൂണിയൻ ചെയർവുമണും സുപ്രീം കൗൺസിൽ ഫോർ മദർഹുഡ് ആൻഡ് ചൈൽഡ്ഹുഡിന്റെ പ്രസിഡന്റും ഫാമിലി ഡെവലപ്മെന്റ് ഫൗണ്ടേഷന്റെ സുപ്രീം ചെയർ വുമണുമായ ഷെയ്ഖ ഫാത്തിമ ബിൻത് മുബാറക്കും എമിറേറ്റ്സിലെയും ലോകമെമ്പാടുമുള്ള എല്ലാ അമ്മമാർക്കും ആശംസകൾ അർപ്പിച്ചു. യുഎഇയിലെയും ലോകത്തെയും അമ്മമാർ സ്നേഹത്തിന്റെയും സമർപ്പണത്തിന്റെയും ആത്മാർത്ഥതയുടെയും പ്രതീകമാണെന്നും ഷെയ്ഖ ഫാത്തിമ കൂട്ടിച്ചേർത്തു.
1956-ൽ ഈജിപ്തിലാണ് ആദ്യമായി മാർച്ച് 21 അറബ് ലോകത്തെ മാതൃദിനമായി പ്രഖ്യാപിച്ചത്. ആതേ പാരമ്പര്യമാണ് ഇന്നും അറബ് രാജ്യങ്ങൾ പിന്തുടരുന്നത്. ലോകമെമ്പാടും വ്യത്യസ്ത ദിവസങ്ങളിലായാണ് മാതൃദിനം ആഘോഷിക്കുക. മറ്റ് പല രാജ്യങ്ങളിലും മെയ് മാസത്തിലാണ് മാതൃദിനം ആഘോഷിക്കുന്നത്. അതേസമയം യുകെയിൽ ഞായറാഴ്ച അമ്മമാരെ ആദരിച്ചിരുന്നു.
