ഇന്ത്യയ്‌ക്കെതിരായ ഏകദിന പരമ്പരയ്ക്കുള്ള ഓസ്‌ട്രേലിയൻ ടീമിനെ സ്റ്റീവ് സ്മിത്ത് നയിക്കും. പാറ്റ് കമ്മിൻസ് പരമ്പരയിൽ നിന്ന് വിട്ടുനിൽക്കുന്നതിനെത്തുടർന്നാണ് സ്മിത്തിന് അവസരം ലഭിച്ചത്. ഇന്ത്യയ്‌ക്കെതിരായ രണ്ടാം ടെസ്റ്റിനുശേഷമാണ് കമ്മിൻസ് അമ്മയുടെ മരണത്തെത്തുടർന്ന് നാട്ടിലേക്ക് മടങ്ങിയത്. ശേഷിച്ച രണ്ട് ടെസ്റ്റ് മത്സരങ്ങളിൽ സ്മിത്താണ് ഓസ്‌ട്രേലിയയെ നയിച്ചത്.
അമ്മയുടെ മരണത്തെത്തുടർന്ന് കമ്മിൻസ് ഓസ്‌ട്രേലിയയിൽ കുടുംബാംഗങ്ങൾക്കൊപ്പമാണ്. ഇന്ത്യയ്‌ക്കെതിരായ ഏകദിന പരമ്പരയിൽ കമ്മിൻസ് കളിക്കില്ലെന്ന് ഓസ്‌ട്രേലിയൻ ക്രിക്കറ്റ് ടീം പരിശീലകൻ ആൻഡ്രൂ മക്‌ഡൊണാൾഡ് പറഞ്ഞു.
സ്മിത്ത് നായകനായി സ്ഥാനമേറ്റതോടെ ഓസ്ട്രേലിയ അവസാന രണ്ട് ടെസ്റ്റിലും പരാജയപ്പെട്ടില്ല. മൂന്നാം ടെസ്റ്റിൽ വിജയിച്ച ഓസീസ് നാലാം ടെസ്റ്റിൽ സമനില വഴങ്ങി. മാർച്ച് 17ന് മുംബൈ വാഖഡെ സ്റ്റേഡിയത്തിലാണ് ഇന്ത്യ-ഓസ്ട്രേലിയ ആദ്യ ഏകദിനം. രണ്ടാം ഏകദിനം 19 വിശാഖപട്ടണത്ത് നടക്കും. അവസാന ഏകദിനം 22ന് ചെന്നൈ എംഎ ചിദംബരം സ്റ്റേഡിയത്തിൽ നടക്കും.
