ലോകകപ്പ് ഫുട്ബോള് ഉദ്ഘാടനത്തിന് ശേഷം ഖത്തറിനെ പ്രശംസിച്ച് സൗദി കിരീടാവകാശി. ഖത്തർ അമീറിനെ സംഘാടനമികവിന് അഭിനന്ദിച്ചും തനിക്ക് ലഭിച്ച സ്വീകരണത്തിന് നന്ദി അറിയിച്ചും സൗദി കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരൻ്റെ സന്ദേശം. ഞായറാഴ്ച ലോകകപ്പ് ഉദ്ഘാടന ചടങ്ങില്‍ പങ്കെടുത്ത ശേഷം ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍ ഥാനിക്ക് പ്രത്യേകം സന്ദേശം അയച്ചു.
“എനിക്കും ഒപ്പം വന്ന സംഘത്തിനും ലഭിച്ച ഊഷ്‍മളമായ സ്വീകരണത്തിനും ആതിഥ്യത്തിനും നന്ദിയർപ്പിച്ചാണ് ഞാന്‍ ഈ രാജ്യം വിടുന്നത്. ഫിഫ ലോകകപ്പ് ഫുട്ബോള് ഉദ്ഘാടന ചടങ്ങിൻ്റെ വിജയകരമായ സംഘാടനത്തിന് നിങ്ങളെ അഭിനന്ദിക്കുന്നു”, മുഹമ്മദ് ബിന്‍ സല്‍മാന്‍ രാജകുമാരൻ്റെ സന്ദേശത്തില്‍ പറയുന്നു. ഖത്തര്‍ അമീറിന് ആരോഗ്യവും സന്തോഷവും നേരുന്നതോടൊപ്പം ഖത്തറിലെ ജനങ്ങള്‍ക്ക് കൂടുതല്‍ പുരോഗതിയും അഭിവൃദ്ധിയുമുണ്ടാകട്ടെ എന്നും ആശംസിച്ചു.
ലോകകപ്പ് സംഘാടനത്തിന് ഖത്തറിന് വേണ്ട എല്ലാ പിന്തുണയും സഹായവും നല്‍കണമെന്ന് സൗദി കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്‍ സൗദി അറേബ്യയിലെ എല്ലാ മന്ത്രാലയങ്ങള്‍ക്കും സര്‍ക്കാര്‍ ഏജന്‍സികള്‍ക്കും നിര്‍ദേശം നല്‍കിയിരുന്നു. ഉദ്ഘാടന മത്സരത്തില്‍ ഖത്തര്‍ ടീമിന് പിന്തുണയുമായി ടീം സ്‍കാര്‍ഫ് അണി‌ഞ്ഞാണ് സൗദി കിരീടാവകാശി ഗ്യാലറിയിലിരുന്നത്. അതിനുമുൻപ് ഖത്തര്‍ അമീര്‍ ഒരുക്കിയ സ്വീകരണത്തിലും അദ്ദേഹം പങ്കെടുത്തിരുന്നു.
