റൊണാൾഡോയും സൗദി ക്ലബ്ബായ അല്‍ നസറിലേക്ക് ചേക്കേറിയതിന് പിന്നാലെ ക്രിസ്റ്റ്യാനോയുടെയും പങ്കാളിയുടെയും ജീവിതം വലിയ രീതിയിലുള്ള ചർച്ചയാവുകയാണ്. റൊണാൾഡോയുടെ പിറന്നാളിന് ജീവിത പങ്കാളി നൽകിയ സമ്മാനവും ചർച്ചയായിരുന്നു. ഇപ്പോള്‍ ക്രിസ്റ്റിയാനോയുടെ പോര്‍ച്ചുഗലിലുള്ള വീട്ടിലേക്ക് വിദഗ്ധനായ ഷെഫിനെ തേടുകയാണെന്നാണ് പുറത്ത് വരുന്ന റിപ്പോര്‍ട്ടുകൾ. 17 മില്യണ്‍ പൗണ്ട് ചെലവില്‍ പോര്‍ച്ചുഗലിലെ ക്വിൻ്റാ ഡാ മരിഞ്ഞയിൽ നിര്‍മിച്ചുകൊണ്ടിരിക്കുന്ന പുതിയ വീട്ടിലേക്കാണ് റൊണാള്‍ഡോ പാചകക്കാരനെ വേണ്ടത്.
എന്നാൽ റൊണാള്‍ഡോയും പങ്കാളിയായ ജോര്‍ജിനിയ റോഡ്രിഗസും മുന്നോട്ടുവച്ച ഡിമാൻ്റുകൾ അനുസരിച്ച് ഷെഫിനെ കിട്ടാന്‍ ബുദ്ധിമുട്ട് നേരിടുകയാണ്. പോര്‍ച്ചുഗീസ്, അന്തര്‍ദേശീയ വിഭവങ്ങള്‍ എന്നിവ പാചകം ചെയ്യാന്‍ കഴിയുന്ന ഷെഫിനെയാണ് റൊണാൾഡോയും കുടുംബവും തേടുന്നത്. മീന്‍, സീഫുഡ്, റൊണാള്‍ഡോയുടെ പ്രിയപ്പെട്ട ഭക്ഷണമായ സുഷി എന്നിവ പാചകം ചെയ്യുന്നതിലും ഷെഫ് വിദഗ്ദ്ധനായിരിക്കണമെന്ന നിബന്ധനയുണ്ട്. കൂടാതെ ഷെഫിന് ഒരു മാസത്തെ ശമ്പളമായി 4,500 പൗണ്ട് (ഏകദേശം 4,54,159 ഇന്ത്യന്‍ രൂപ) ആണ് റൊണാള്‍ഡോ വാഗ്ദാനം ചെയ്യുന്നത്. എന്നാൽ ആകര്‍ഷകമായ ശമ്പളമുണ്ടായിട്ടും മികച്ച ഷെഫിനെ ഇതുവരെ കണ്ടെത്താനായിട്ടില്ലെന്നാണ് സൂചന.
റൊണാള്‍ഡോയുടെ ‘റിട്ടയര്‍മെൻ്റ് ഹോം’ എന്ന് വിശേഷിപ്പിക്കാവുന്ന പുതിയ വീടിൻ്റെ നിര്‍മാണം ജൂണില്‍ പൂര്‍ത്തിയാകുമെന്നാണ് കരുതുന്നത്. ഈയിടെയാണ് രണ്ടര വര്‍ഷത്തെ കരാറില്‍ സൗദി അറേബ്യന്‍ ക്ലബ് അല്‍ നസറില്‍ ചേര്‍ന്ന റൊണാള്‍ഡോ കഴിഞ്ഞ മാസമാണ് സൗദി അറേബ്യയിലേക്ക് താമസം മാറിയത്. റൊണാൾഡോയുടെ പങ്കാളിയായ ജോര്‍ജിന റോഡ്രിഗസും കുട്ടികളും റൊണാള്‍ഡോയ്‌ക്കൊപ്പമുണ്ട്. റിയാദിലെ ഫോര്‍ സീസണ്‍സ് ഹോട്ടലിലെ സ്യൂട്ടിലാണ് റൊണാള്‍ഡോ നിലവില്‍ താമസിക്കുന്നത്.
