ഷാർജ: സ്ട്രൈക്കേഴ്സ് ഡാൻസ് ആൻഡ് എന്റർടെയിൻമെന്റ് സർവീസസ് ഒരുക്കുന്ന “രംഗോത്സവ് – ദി ഇന്ത്യൻ നൈറ്റ്” ഈ മാസം പതിനെട്ടിന്. ഷാർജ ഇൻവെസ്റ്റ്മെന്റ് ആൻഡ് ഡെവലപ്മെന്റ് അതോറിറ്റിയുടെ (ശുറൂഖ് ) ഉടമസ്ഥതയിലുള്ള ദി ഫ്ലാഗ് ഐലൻഡിൽ വെച്ചാണ് രംഗോത്സവ് അരങ്ങേറുന്നത് . സംഗീതം, നൃത്തം, ഫാഷൻ, കലാപ്രകടനം എന്നിവ സംയോജിപ്പിച്ചു കൊണ്ടുള്ള മനോഹരമായ ആവിഷ്ക്കാരമാണ് ഒരുക്കുന്നതെന്ന് സംഘാടകരായ സ്ട്രൈക്കേഴ്സ് ഡാൻസ് ആൻഡ് എന്റർടെയിൻമെന്റ് സർവീസസ് അധികൃതർ വാർത്താ സമ്മേളനത്തിൽ അറിയിച്ചു.
ഇന്ത്യൻ സംസ്കാരത്തിന്റെ വൈവിധ്യത്തെയും പൈതൃകത്തെയും അവതരിപ്പിക്കുന്ന ആഘോഷമാണ് “രംഗോത്സവ് – ദി ഇന്ത്യൻ നൈറ്റിൽ “ടൈംലെസ് എക്കോസ് ഓഫ് എസ്.പി.ബി” എന്ന പ്രത്യേക സംഗീതാർപ്പണമാണ് പ്രധാന ആകർഷണം. ഇതിഹാസ ഗായകനായ എസ്. പി. ബാലസുബ്രഹ്മണ്യത്തിന്റെ അനശ്വര ഗാനങ്ങളെയും സംഗീത യാത്രയെയും ആദരിക്കുന്ന പ്രൗഢമായ ചടങ്ങാണ് ഇതെന്ന് സ്ട്രൈക്കേഴ്സ് ഡാൻസ് ആൻഡ് എന്റർടെയിൻമെന്റ് സർവീസസ് സി.ഇ.ഒ പദ്മ രാമചന്ദ്രൻ പറഞ്ഞു.
നൃത്തവിഭാഗത്തിൽ, ബോളിവുഡ് നൃത്തങ്ങളുടെ ഊർജസ്വലതയും കഥക് അടക്കമുള്ള ശാസ്ത്രീയ നൃത്തരൂപങ്ങളുടെ സൗന്ദര്യവും ഒരുമിക്കുന്ന മനോഹര അവതരണങ്ങളാണ് അരങ്ങേറുക. വർണ്ണാഭമായ വേഷങ്ങളും മനോഹരമായ ചുവടുവെപ്പുകളും ഇന്ത്യയുടെ സമ്പന്നമായ സാംസ്കാരിക പൈതൃകത്തെ വേദിയിൽ പകർന്നുനൽകും. ഇതോടൊപ്പം ആകർഷകമായ ഫാഷൻ ഷോകളും പ്രാദേശിക പ്രതിഭകളുടെ പ്രകടനങ്ങളും ഉണ്ടായിരിക്കും.
പ്രശസ്ത ഗായകരായ നിഖിൽ മാത്യു, വർഷ എസ്. കൃഷ്ണൻ, അഖില എന്നിവർ ലൈവ് സംഗീതാവതരണങ്ങളുമായി വേദിയിലെത്തും. പ്രണയഗാനങ്ങളും ഹൃദയസ്പർശിയായ മെലഡികളും ജനപ്രിയ ബോളിവുഡ് ഹിറ്റുകളും ഉൾപ്പെടുന്ന ഗാനവിരുന്നാണ് ഒരുക്കുന്നത്. ഇതോടൊപ്പം പ്രശസ്തരായ നിരവധി കലാകാരന്മാരുടെ സാന്നിധ്യവും രംഗോത്സവ് – ദി ഇന്ത്യൻ നൈറ്റിന്റെ മാറ്റ് കൂട്ടുമെന്ന് സംഘാടകർ അറിയിച്ചു. കല, സംഗീതം, സംസ്കാരം എന്നിവയിലൂടെ ആളുകളെ ഒരുമിപ്പിക്കുന്ന ഒരു സമൂഹാഘോഷമായി ‘രംഗോത്സവ് – ദി ഇന്ത്യൻ നൈറ്റ്’ മാറുമെന്നും സംഘാടകർ പറഞ്ഞു. വൈകുന്നേരം നാല് മുതൽ രാത്രി പന്ത്രണ്ട് മണി വരെ നടക്കുന്ന പരിപാടിയിലേക്കുള്ള പ്രവേശനം സൗജന്യമാണ്.
