അപകീര്‍ത്തി പരാമര്‍ശത്തില്‍ ശിക്ഷാവിധി റദ്ദാക്കിയതോടെ പാര്‍ലമെന്റില്‍ തിരിച്ചെത്തി രാഹുല്‍ ഗാന്ധി. പാര്‍ലമെന്റില്‍ എത്തിയ രാഹുല്‍ ഗാന്ധിക്ക് ഒന്നാം നമ്പര്‍ ഗേറ്റില്‍ കോണ്‍ഗ്രസ് പ്രവര്‍ത്തകരും പ്രതിപക്ഷ സഖ്യമായ ‘ഇന്ത്യ’യിലെ അംഗങ്ങളും സ്വീകരണം നല്‍കി. ഗാന്ധി പ്രതിമയെ വണങ്ങിയ ശേഷമാണ് രാഹുല്‍ ഗാന്ധി പാര്‍ലമെന്റിലേക്ക് കടന്നത്.
ഇന്ന് രാവിലെയാണ് രാഹുലിന്റെ പാര്‍ലമെന്റ് അംഗത്വം പുനസ്ഥാപിച്ച് ലോക്‌സഭ സെക്രട്ടേറിയറ്റ് വിജ്ഞാപനം പുറപ്പെടുവിച്ചത്.
അപകീര്‍ത്തി കേസില്‍ ഗുജറാത്ത് സൂറത്ത് കോടതി രണ്ട് വര്‍ഷമാണ് രാഹുല്‍ ഗാന്ധിക്ക് തടവ് ശിക്ഷ വിധിച്ചത്. എം.പി സ്ഥാനത്ത് നിന്ന് അയോഗ്യനാക്കുകയും ചെയ്തു. ഇതിന് പിന്നാലെ രാഹുല്‍ ഗാന്ധിയുടെ ഹര്‍ജി പരിഗണിച്ച സുപ്രീം കോടതി സൂറത്ത് കോടതിയുടെ വിധി റദ്ദാക്കിയിരുന്നു. ഇതോടെയാണ് രാഹുലിന് വീണ്ടും പാര്‍ലമെന്റിലേക്കെത്താനുള്ള വഴി തെളിഞ്ഞത്.
जननायक राहुल गांधी जी संसद पहुंच गए हैं. pic.twitter.com/DftUMDOnbz
— Congress (@INCIndia) August 7, 2023
134 ദിവസത്തിന് ശേഷമാണ് രാഹുലിന് ലോക്‌സഭാ അംഗത്വം തിരിച്ചുകിട്ടുന്നത്. മണിപ്പൂര്‍ വിഷയത്തില്‍ പ്രതിപക്ഷം കൊണ്ടുവന്ന അവിശ്വാസ പ്രമേയം നാളെ ചര്‍ച്ചയ്ക്ക് എടുക്കുമ്പോള്‍ സഭയില്‍ രാഹുല്‍ ഗാന്ധിയും ഉണ്ടാകും. ചൊവ്വാഴ്ചയും ബുധനാഴ്ചയുമായി 12 മണിക്കൂറാണ് അവിശ്വാസ പ്രമേയ ചര്‍ച്ചയ്ക്ക് ലോക്‌സഭ നീക്കിവെച്ചിരിക്കുന്നത്.
