പുതുപ്പള്ളി ഉപതെരഞ്ഞെടുപ്പില് സിപിഎം നേതാവ് ജെയ്ക് സി തോമസ് തന്നെ എല്.ഡി.എഫ് സ്ഥാനാര്ത്ഥിയാകും. ഇന്ന് ചേര്ന്ന സെക്രട്ടറിയേറ്റ് യോഗത്തിലാണ് തീരുമാനം. ജെയ്കിന്റെ പേര് മാത്രമാണ് ജില്ലാ സെക്രട്ടറിയേറ്റ് നിര്ദേശിച്ചതെന്ന റിപ്പോര്ട്ടുകളുണ്ട്.
ഔദ്യോഗിക പ്രഖ്യാപനം നാളെ കോട്ടയത്ത് വെച്ച് നടക്കും. മുന് മുഖ്യമന്ത്രിയും കോണ്ഗ്രസ് നേതാവുമായിരുന്ന ഉമ്മന് ചാണ്ടിയുടെ മരണത്തിന് പിന്നാലെയാണ് പുതുപ്പള്ളിയില് ഉപതെരഞ്ഞെടുപ്പ് നടത്താനൊരുങ്ങുന്നത്.
സെപ്തംബര് അഞ്ചിനാണ് പുതുപ്പള്ളിയില് വോട്ടെടുപ്പ്. എട്ടിന് വോട്ടെണ്ണല് നടക്കും. ജാര്ഖണ്ഡ്, ത്രിപുര, പശ്ചിമ ബംഗാള്, ഉത്തര്പ്രദേശ്, ഉത്തരാഖണ്ഡ് എന്നീ സംസ്ഥാനങ്ങളിലെ ഉപതെരഞ്ഞെടുപ്പുകള്ക്കൊപ്പമാണ് പുതുപ്പള്ളിയിലും തെരഞ്ഞെടുപ്പ് നടക്കുക.
ഇത് മൂന്നാം വട്ടമാണ് ജെയ്ക് സി തോമസ് പുതുപ്പള്ളി മണ്ഡലത്തില് മത്സരിക്കാനൊരുങ്ങുന്നത്. കഴിഞ്ഞ രണ്ട് നിയമസഭാ തെരഞ്ഞെടുപ്പുകൡും ഉമ്മന് ചാണ്ടിക്കെതിരെ മത്സരിച്ച് പരാജയപ്പെട്ടിരുന്നു. പുതുപ്പള്ളിയിലെ ഉപതെരഞ്ഞെടുപ്പില് ഉമ്മന് ചാണ്ടിയുടെ മകന് ചാണ്ടി ഉമ്മനാണ് യുഡിഎഫ് സ്ഥാനാര്ത്ഥിയായി മത്സരിക്കുന്നത്.
2016ലാണ് ആദ്യമായി ജെയ്ക് സി. തോമസ് ഉമ്മന് ചാണ്ടിക്കെതിരെ പുതുപ്പള്ളി മണ്ഡലത്തില് മത്സരിച്ചത്. ആ തെരഞ്ഞെടുപ്പില് ഉമ്മന് ചാണ്ടിയോട് 27,092 വോട്ടുകള്ക്ക് പരാജയപ്പെട്ട ജെയ്ക് 2021ല് പരാജയപ്പെട്ടത് വെറും 9044 വോട്ടുകള്ക്കാണ്. ഉമ്മന് ചാണ്ടിയുടെ ഭൂരിപക്ഷം വലിയ രീതിയില് കുറയ്ക്കാന് ജെയ്ക് സി തോമസിനായി എന്നതുകൊണ്ട് തന്നെയാണ് ഉപതെരഞ്ഞെടുപ്പിലും അദ്ദേഹത്തെ തന്നെ മത്സരിപ്പിക്കാന് സിപിഎം ഒരുങ്ങുന്നത്.
സിപിഎം ജില്ലാ കമ്മിറ്റിയംഗവും ഡിവൈഎഫ്ഐ കേന്ദ്ര സെക്രട്ടറിയേറ്റ് അംഗവുമാണ് ജെയ്ക് സി തോമസ്.
