നടൻ പ്രിത്വിരാജ് സുകുമാരൻ്റെ കാറായ ലംബോര്ഗിനി ഹുറാക്കാന് വാർത്തകളിൽ നിറഞ്ഞുനിന്നിരുന്ന താരമാണ്. എന്നാൽ താരം ഹുറാക്കാന് എക്സ്ചേഞ്ച് ചെയ്ത് ലംബോര്ഗിനിയുടെ എസ്യുവി ഉറൂസ് വാങ്ങിയതോടെ പ്രശസ്തമായ ആ ഹുറാക്കാന് പുതിയെ ഉടമയെ കാത്തിരിക്കുകയായിരുന്നു. ഇപ്പോഴിതാ ആ താര വാഹനത്തിന് പുതിയ ഉടമയെത്തിയിരിക്കുന്നു.
കോഴിക്കോട് സ്വദേശിയും ഇന്ഡോ ഇലക്ട്രിക് മാര്ട്ട് ഉടമയുമായ വി സനന്ദ് ആണ് പുതിയ ഉടമസ്ഥൻ. ലംബോര്ഗിനിയുടെ ഏറ്റവും ഹിറ്റ് മോഡലുകളിലൊന്നായ ഹുറാക്കാൻ്റെ എല്പി 580 എന്ന റിയര് വീല് ഡ്രൈവ് മോഡലാണ് ഇത്. നാലരക്കോടിയുടെ ഈ സൂപ്പര് കാര് വാങ്ങാന് സനന്ദിന് പകരം എത്തിയത് എട്ടാം ക്ലാസിലും അഞ്ചാം ക്ലാസിലും പഠിക്കുന്ന മക്കളായ മാനവ് ഇന്ഡോയും അഭിനവ് ഇന്ഡോയുമാണ്.
2018-ലാണ് പ്രിത്വിരാജ് ഹുറാക്കാന് സ്വന്തമാക്കിയത്. വെറും 1100 കിലോമീറ്റര് മാത്രമാണ് ഈ കാര് ഇതുവരെ സഞ്ചരിച്ചിരിക്കുന്നത്. 5.2 ലിറ്റര്, നാച്ചുറലി ആസ്പിരേറ്റഡ് വി 10 എഞ്ചിനാണ് കാറിൻ്റേത്. എഞ്ചിന് 572 ബിഎച്ച്പി കരുത്തും 540 എന്എം ടോര്ക്കുമുണ്ട്. 7 സ്പീഡ് ഓട്ടോമാറ്റിക്കാണ് ഗിയര് ബോക്സ്. പൂജ്യത്തില് നിന്ന് 100 കിലോമീറ്റര് വേഗം കൈവരിക്കാന് വെറും 3.4 സെക്കന്ഡ് മാത്രം മതി ഹുറാക്കാന്. കൂടാതെ ഈ കാറിൻ്റെ പരമാവധി വേഗം 320 കിലോമീറ്ററാണ്.
