അമ്പലപ്പുഴ: ആലപ്പുഴ സ്വദേശി ഒമാനിലെ സലാലയിൽ ഭക്ഷ്യവിഷബാധയേറ്റ് മരിച്ചു. വി.ശ്രീകുമാറാണ് മരിച്ചത്. 44 വയസ്സായിരുന്നു. ആമയിടം പുണർതം ചോളംതറയിൽ വാസുദേവൻപിള്ളയുടേയും ഇന്ദിരാദേവിയുടേയും മകനായിരുന്നു.
മർമൂളിന് സമീപം ഹർവീലിൽ പി.ഡി.ഒ സൈറ്റിൽ സ്വകാര്യ കമ്പനിയിൽ മെക്കാനിക്കൽ എൻജിനീയറായി ജോലി ചെയ്തു വരികയായിരുന്നു. ചർദിയും വയറുവേദനയുമായി ഒരാഴ്ചയായി ചികിത്സയിലായിരുന്നു. കഴിഞ്ഞ ഞായറാഴ്ചയാണു മരണപെട്ടത്.
സലാല സുൽത്താൻ ഖാബൂസ് ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം ഇന്ന് നാട്ടിൽ കൊണ്ടുപോയി നാളെ വൈകിട്ട് 3നു വീട്ടുവളപ്പിൽ സംസ്കാരം നടത്തുമെന്ന് ബന്ധപ്പെട്ടവർ അറിയിച്ചു. അമ്പലപ്പുഴ കോമന കൃഷ്ണഭവനത്തിൽ പ്രിയ ശ്രീകുമാറാണ് ഭാര്യ. മകൻ ഋഷികേശ്.
