കേരളത്തിലെ പ്ലസ് വൺ ക്ലാസുകൾ ഇന്ന് മുതൽ ആരംഭിക്കും. മൂന്നാംഘട്ട അലോട്ട്മെന്റ് നേടിയ വിദ്യാർത്ഥികളുടെ പ്രവേശനം ഇന്ന് 5 മണിവരെയായി നീട്ടിയിട്ടുണ്ടെന്ന് അധികൃതർ അറിയിച്ചു. ആകെ 2,96,271 സീറ്റുകളാണുള്ളത്. അതിൽ 2,95,118 സീറ്റുകളിലേക്കുള്ള അലോട്ട്മെന്റുകളും ഇതിനോടകം തന്നെ പൂർത്തിയായിട്ടുണ്ട്. മാനേജ്മെന്റ് – അൺ എയ്ഡഡ് ക്വാട്ടകളിൽ പ്രവേശനം നേടിയവരിൽ മൂന്നാംഘട്ട അലോട്ട്മെന്റ് ലഭിച്ചവർക്ക് മെറിറ്റ് ക്വാട്ടയിൽ പ്രവേശനം നേടാനുള്ള സംവിധാനവുമുണ്ട്.
അലോട്ട്മെൻറ് ലഭിച്ചിട്ടും അതാത് സ്കൂളുകളിൽ പ്രവേശനം നേടാത്ത വിദ്യാർത്ഥികൾക്ക് തുടർന്നുള്ള അലോട്ട്മെൻറുകളിൽ പരിഗണന ലഭിക്കില്ലെന്ന് അധികൃതർ അറിയിച്ചു. അപേക്ഷിച്ചിട്ടും ഇതുവരെ അലോട്ട്മെൻറ് ലഭിക്കാത്തവർക്ക് സപ്ലിമെൻററി അലോട്ട്മെൻറിൽ പരിഗണന ലഭിക്കാൻ അപേക്ഷ പുതുക്കി നൽകാവുന്നതാണ്.
