എന്‍.സി.പി സംസ്ഥാന അധ്യക്ഷനായി പിസി ചാക്കോ തുടരും. ഇന്ന് ചേര്‍ന്ന നേതൃയോഗത്തിലാണ് പിസി ചാക്കോയെ വീണ്ടും തെരഞ്ഞെടുത്തത്. മന്ത്രി എകെ ശശീന്ദ്രനാണ് പിസി ചാക്കോയുടെ പേര് നിര്‍ദേശിച്ചത്. തുടർന്ന് തോമസ് കെ തോമസ് പിന്താങ്ങുകയും ചെയ്തു.
പിസി ചാക്കോയ്ക്ക് അധ്യക്ഷ പദവിയില്‍ ഒരു അവസരം കൂടി നല്‍കാന്‍ പാര്‍ട്ടിയില്‍ നേരത്തെ ധാരണയുണ്ടായിരുന്നു. അഡ്വ. പിഎം സുരേഷ് ബാബു, പി.കെ രാജന്‍ മാസ്റ്റര്‍, ലതിക സുഭാഷ് എന്നിവരെ വൈസ് പ്രസിഡന്‍റുമാരായും പി.ജെ കുഞ്ഞുമോനെ ട്രഷററായും തെരഞ്ഞെടുത്തു.
അതേസമയം, തെരഞ്ഞെടുപ്പ് നടപടികളില്‍ പ്രതിഷേധിച്ച് മലപ്പുറത്ത് നിന്നുള്ള മുന്‍ ദേശീയ നേതാവ് എന്‍എ മുഹമ്മദ് കുട്ടി ഇറങ്ങിപോയി. കൈകള്‍ ഉയര്‍ത്തിയാണ് വോട്ടെടുപ്പ് നടന്നതെന്നും ഇത് ജനാധിപത്യ രീതിയല്ലെന്നും ആരോപിച്ചായിരുന്നു മുഹമ്മദ് കുട്ടി ഇറങ്ങിപ്പോയത്. മത്സരത്തിന് മുഹമ്മദ് കുട്ടിയും നോമിനേഷന്‍ നല്‍കിയിരുന്നു.
