വിസ്താര എയര്‍ലൈന്‍സില്‍ ജീവനക്കാർക്ക് നേരെ യാത്രക്കാരി സംഘര്‍ഷമുണ്ടാക്കി. അബുദാബിയില്‍ നിന്ന് മുംബൈയിലേക്കുള്ള വിമാനത്തിലാണ് സംഭവം. ഇവരെ പോലീസ് അറസ്റ്റ് ചെയ്തു. ഇറ്റലിയില്‍ നിന്നുള്ള പാവോള പെറൂച്ചിയോ എന്ന സ്ത്രീയാണ് മോശം പെരുമാറ്റത്തെ തുടര്‍ന്ന് അറസ്റ്റിലായത്. ക്യാബിന്‍ ക്രൂ അംഗങ്ങളുമായി സംഘര്‍ഷ സാഹചര്യമുണ്ടാക്കിയതിനും മോശം പെരുമാറ്റത്തിനുമാണ് അധികൃതര്‍ നടപടി സ്വീകരിച്ചത്.
ഇക്കണോമി ടിക്കറ്റിലാണ് പാവോള യാത്ര ചെയ്തിരുന്നത്. എന്നാൽ ഇവർക്ക് ബിസിനസ് ക്ലാസ് വേണമെന്ന് നിര്‍ബന്ധം പിടിച്ചു. അതിന് സാധിക്കില്ലെന്ന് ജീവനക്കാർ അറിയിക്കുകയും ചെയ്തു. എന്നാൽ പ്രകോപിതയായ സ്ത്രീ ഇതിന്റെ പേരില്‍ പ്രശ്‌നമുണ്ടാക്കുകയും വിമാനത്തിലെ ക്യാബിന്‍ ക്രൂ അംഗങ്ങളെയും ആക്രമിക്കുകയും ചെയ്തു. കൂടാതെ ഈ സ്ത്രീ വസ്ത്രങ്ങൾ അഴിച്ചുമാറ്റുകയും അര്‍ധനഗ്നയായി വിമാനത്തിലൂടെ നടക്കുകയും ചെയ്തു.
അതേസമയം അറസ്റ്റ് ചെയ്ത ഇവരെ പൊലീസ് ജാമ്യത്തില്‍ വിട്ടയച്ചു. എന്നാൽ സ്റ്റാന്‍ഡാര്‍ഡ് ഓപറേറ്റിംഗ് നടപടിക്രമങ്ങളനുസരിച്ച് ഈ സംഭവം ഉന്നതാധികാരികളെ അറിയിച്ചിട്ടുണ്ടെന്ന് വിസ്താര എയര്‍ലൈന്‍ വക്താവ് അറിയിച്ചു. ഇത്തരത്തിൽ ഉപഭോക്താക്കളുടെയും ജീവനക്കാരുടെയും സുരക്ഷയെയും അന്തസിനെയും ബാധിക്കുന്ന സംഭവങ്ങള്‍ക്കെതിരെ എയര്‍ലൈന്‍ കടുത്ത നടപടികള്‍ സ്വീകരിക്കമെന്നും എയര്‍ലൈന്‍ വക്താവ് കൂട്ടിച്ചേർത്തു.
