തെരഞ്ഞെടുപ്പിൽ ഒരു സ്ഥാനാർത്ഥി ഒരു മണ്ഡലത്തിൽ മാത്രം മത്സരിച്ചാൽ മതിയെന്ന് തെരഞ്ഞെടുപ്പ് കമ്മീഷൻ കേന്ദ്ര സർക്കാരിന് ശുപാർശ സമർപ്പിച്ചതായി റിപ്പോർട്ട്. സാമ്പത്തിക ചെലവ് അടക്കമുള്ള പ്രായോഗികവശങ്ങൾ ഉയർത്തിക്കാട്ടിയാണ് മുഖ്യ തെരഞ്ഞെടുപ്പ് കമ്മീഷണർ രാജീവ് കുമാർ കേന്ദ്രത്തിന് നിർദ്ദേശം വച്ചിരിക്കുന്നത്. രണ്ട് മണ്ഡലങ്ങളിലും ഒരേ സ്ഥാനാർത്ഥി ജയിച്ചാൽ അതിൽ ഒരു മണ്ഡലത്തിൽ ഉപതെരഞ്ഞെടുപ്പ് നടത്താൻ ആവശ്യമായ അധിക സാമ്പത്തിക ചെലവും ജോലി ഭാരവും കമ്മീഷൻ നിയമമന്ത്രാലയത്തെ ധരിപ്പിച്ചിട്ടുണ്ടെന്നാണ് സൂചന.
ജനപ്രാതിനിധ്യ നിയമത്തിലെ 33ാം വകുപ്പ് ഭേദഗതി ചെയത് വേണം ശുപാർശ നടപ്പിലാക്കാൻ. ഒരു സ്ഥാനാർത്ഥിക്ക് രണ്ട് മണ്ഡലത്തിൽ മത്സരിക്കാൻ അനുമതി നൽകുന്നതാണ് നിലവിലുള്ള ജനപ്രാതിനിധ്യ നിയമം. 2004ലും തെരഞ്ഞെടുപ്പ് കമ്മീഷൻ ഇതേ ശുപാർശ നൽകിയിരുന്നെങ്കിലും സർക്കാർ അംഗീകരിച്ചിരുന്നില്ല.
