മാസപ്പടി ആരോപണങ്ങളില്‍ മുഖ്യമന്ത്രി പിണറായി വിജയനും മകള്‍ വീണ വിജയനും എതിരെ വിജിലന്‍സ് അന്വേഷണം നടത്തണമെന്ന ആവശ്യം തള്ളി മൂവാറ്റുപുഴ വിജിലന്‍സ് കോടതി. തെളിവുകളുടെ അഭാവം ചൂണ്ടിക്കാട്ടിയാണ് അന്വേഷണത്തിന് ഉത്തരവിടാന്‍ ആവില്ലെന്ന് കോടതി വ്യക്തമാക്കിയത്.
കളമശ്ശേരി സ്വദേശി ഗിരീഷ് ബാബുവാണ് മൂവാറ്റുപുഴ കോടതിയില്‍ ഹര്‍ജി നല്‍കിയത്. പിണറായി വിജയന്റെ മകള്‍ വീണ വിജയന്‍ അടക്കം കരിമണല്‍ കമ്പനിയോട് വാങ്ങിയത് മാസപ്പടിയാണെന്നതില്‍ അന്വേഷിച്ച് നടപടിയെടുക്കണമെന്ന് ആവശ്യപ്പെട്ടായിരുന്നു ഹര്‍ജി നല്‍കിയത്.
എന്നാല്‍ കുറ്റകൃത്യം നടന്നുവെന്ന് തെളിയിക്കാനുള്ള രേഖകളില്ല. പത്രവാര്‍ത്തകളുടെ പേരില്‍ കേസെടുത്ത് അന്വേഷണം നടത്താന്‍ ഉത്തരവിടാന്‍ ആവില്ലെന്നാണ് കോടതി ഹര്‍ജി തള്ളിക്കൊണ്ട് പറഞ്ഞത്.
യു.ഡി.എഫ് നേതാക്കളായ രമേശ് ചെന്നിത്തല, പി കെ കുഞ്ഞാലിക്കുട്ടി, വി കെ ഇബ്രാഹിം കുഞ്ഞ് എന്നിവരെ കൂടി ഉള്‍പ്പെടുത്തിയായിരുന്നു ഗിരീഷ് ബാബു വിജിലന്‍സ് കോടതിയില്‍ ഹര്‍ജി നല്‍കിയിരുന്നത്. വിജിലന്‍സ് ഡയരക്ടര്‍ക്ക് കത്ത് നല്‍കിയെങ്കിലും നടപടികള്‍ ഉണ്ടാകാത്തതിനെ തുടര്‍ന്നാണ് കോടതിയെ സമീപിച്ചത്.
