തമിഴ്നാട് മുഖ്യമന്ത്രി എം.കെ.സ്റ്റാലിനും കേരളത്തിന്റെ മുഖ്യമന്ത്രി പിണറായി വിജയനും ഇന്ന് കൂടിക്കാഴ്ച നടത്തും. വൈകുന്നേരം കോവളത്ത് വച്ച് നടക്കുന്ന കൂടിക്കാഴ്ചയിൽ ചീഫ് സെക്രട്ടറി ഉൾപ്പെടെയുള്ള ഉദ്യോഗസ്ഥരും പങ്കെടുക്കുമെന്നാണ് ഔദ്യോഗിക വൃത്തങ്ങൾ അറിയിച്ചത്.
അന്തർസംസ്ഥാന വിഷയങ്ങൾ, ജലകരാറുകൾ തുടങ്ങിയ പ്രധാനപ്പെട്ട വിഷയങ്ങൾ ഇരുവരും ചർച്ചചെയ്യും. മുല്ലപ്പെരിയാർ ഡാം സംബന്ധിച്ച കാര്യങ്ങളും , ശിരുവാണി ഡാം ഉൾപ്പെടെയുള്ള കാര്യങ്ങളും ചർച്ചയുടെ ഭാഗമാവുമെന്ന് മുഖ്യമന്ത്രിയുടെ ഓഫിസ് വൃത്തങ്ങൾ അറിയിച്ചു.
തെക്കൻ സംസ്ഥാനങ്ങളുടെ കൗൺസിൽ യോഗത്തിൽ പങ്കെടുക്കാനാണ് എം.കെ.സ്റ്റാലിൻ തിരുവനന്തപുരത്തെത്തുന്നത്. മുഖ്യമന്ത്രിയുമായുള്ള കൂടിക്കാഴ്ചയിൽ നിർണ്ണായകമായ തീരുമാനങ്ങളായിരിക്കും എടുക്കാൻ പോകുന്നതെന്നാണ് സൂചന.
