സ്ത്രീ പുരുഷ അനുപാതത്തിലെ പ്രശ്നങ്ങൾ പരിഹരിക്കണമെന്ന് ആവശ്യപ്പെട്ട് മഹാരാഷ്ട്രയിലെ യുവാക്കൾ പ്രതിഷേധം സംഘടിപ്പിച്ചു. അവിവാഹിതരായ ചെറുപ്പക്കാർക്ക് സര്ക്കാര് വധുവിനെ കണ്ടെത്തി നല്കണമെന്ന ആവശ്യമുന്നയിച്ചായിരുന്നു മാർച്ച് സംഘടിപ്പിച്ചത്. ‘ബ്രൈഡ് ഗ്രൂം മോര്ച്ച’എന്ന സംഘടനയാണ് മാർച്ചിന് നേതൃത്വം നല്കിയത്.
ആവശ്യം അറിയിച്ചുകൊണ്ട് മാര്ച്ചില് പങ്കെടുത്തവര് കളക്ടര്ക്ക് നിവേദനവും നൽകി. വിവാഹ വേഷങ്ങള് ധരിച്ചും കുതിര പുറത്ത് സംഗീതത്തിന്റെ അകമ്പടിയോട് കൂടിയുമാണ് യുവാക്കള് കളക്ടറുടെ ഓഫീസിലെത്തിയത്.
‘ആളുകള് ഈ മാര്ച്ചിനെ പരിഹസിച്ചേക്കാം, എന്നാല് സംസ്ഥാനത്ത് ആണ്-പെണ് അനുപാതവുമായി ബന്ധപ്പെട്ട പ്രശ്നങ്ങള് കാരണം വിവാഹപ്രായമായ യുവാക്കള്ക്ക് വധുവിനെ ലഭിക്കുന്നില്ല എന്നതാണ് ഭയാനകമായ യാഥാര്ത്ഥ്യം,’ ജ്യോതി ക്രാന്തി പരിഷത്ത് സ്ഥാപകന് രമേഷ് ബരാസ്കര് പറഞ്ഞു.
