മലയാളി മെര്ച്ചന്റ് നേവി ഉദ്യോഗസ്ഥനെ നടുക്കടലില് ജോലിക്കിടെ കാണാതായതായി പരാതി. മലപ്പുറം പൂക്കോട്ടുംപാടം സ്വദേശി മനേഷ് കേശവദാസിനെയാണ് കാണാതായത്.
ലൈബീരിയന് എണ്ണക്കപ്പലായ പത്മോസിന്റെ സെക്കന്റ് ഓഫീസറായ മനേഷിനെ അബുദാബിയിലെ ജബല്ധാനയില് നിന്ന് മലേഷ്യയിലേക്കുള്ള യാത്രയ്ക്കിടെയാണ് കാണാതായത്. ഈ മാസം 11 നാണ് മനേഷിനെ കാണാതായത്.
പുലര്ച്ചെ നാലിന് ഡ്യൂട്ടി കഴിഞ്ഞ് വിശ്രമിക്കാന് പോയതിന് ശേഷം ഇദ്ദേഹത്തെ ആര്ക്കും ബന്ധപ്പെടാന് കഴിഞ്ഞില്ലെന്ന് കപ്പല് അധികൃതര് കുടുംബത്തെ അറിയിച്ചു.
കടലില് തെരച്ചില് നടത്തിയെങ്കിലും കണ്ടെത്താനായില്ല. ബോട്ടുകള് ഉപയോഗിച്ച് തെരച്ചില് തുടരുന്നുണ്ട്. അതേസമയം മനേഷുമായി ബന്ധപ്പെട്ട് വിവരങ്ങള്ക്ക് നിലവില് കപ്പല് അധികൃതരുമായി കുടുംബത്തിന് ബന്ധപ്പെടാനും സാധിച്ചിട്ടില്ല. മനേഷിന്റെ കുടുംബം കേന്ദ്രസര്ക്കാരിലും പൊലീസിനും പരാതി നല്കിയിട്ടുണ്ട്.
