റിയാദ്: മലയാളി യുവാവ് സൗദിയിൽ വാഹനാപകടത്തിൽ മരിച്ചു. മലപ്പുറം കരുവാരക്കുണ്ട് സ്വദേശിയായ അലിയാണ് മരണപ്പെട്ടത്. 40 വയസ്സായിരുന്നു. റിയാദിൽ നിന്നും 200 കിലോമീറ്റർ അകലെ അൽ റയ്നിൽ വച്ച് ഇന്ന് ഉച്ചയോടെയാണ് അപകടമുണ്ടായത്. അപകടത്തിൽ മറ്റു നാല് പേർക്ക് കൂടി പരിക്കേറ്റിട്ടുണ്ട്.
റിയാദിലെ സുലൈയിൽ നിന്നും അബഹയിലേക്ക് വാനിൽ പോകുകയായിരുന്നു അലി. അൽ റയ്നിൽ വച്ച് അലിയും സംഘവും സഞ്ചരിച്ച കാർ ഒരു ട്രെയ്ലറുമായി കൂട്ടിയിടിക്കുകയായിരുന്നു. അപകടത്തിൽ പരിക്കേറ്റവരെ കുറിച്ചുള്ള വിവരങ്ങൾ ലഭ്യമല്ല. ഈ കൂട്ടത്തിൽ മലയാളികളുണ്ടോ എന്നും വ്യക്തമല്ല. ഇവരെല്ലാം അൽ റെയ്ൻ ജനറൽ ആശുപത്രിയിൽ ചികിത്സയിലാണ്.
മരിച്ച അലിക്ക് ഭാര്യയും മൂന്ന് കുട്ടികളുമുണ്ട്. റിയാദ് കെഎംസിസി വെൽഫെയർ വിംഗ് ചെയർമാൻ സിദ്ദീഖ് തുവ്വൂർ, അൽ റെയ്ൻ കെഎംസിസി ഭാരവാഹി ശൌക്കത്ത് എന്നിവർ തുടർപ്രവർത്തനങ്ങൾക്ക് നേതൃത്വം കൊടുക്കുന്നുണ്ട്.
