കേരളവര്‍മ കോളേജിലെ വിവാദമായ യൂണിയന്‍ തെരഞ്ഞെടുപ്പിന്റെ റീകൗണ്ടിങ്ങില്‍ കൊച്ചിന്‍ ദേവസ്വം ബോര്‍ഡ് പ്രസിഡന്റ് ഇടപെട്ടെന്ന് പ്രിന്‍സിപ്പല്‍. റീകൗണ്ടിങ്ങിനിടെ തര്‍ക്കമുണ്ടായപ്പോള്‍ നിര്‍ത്തിവെയ്ക്കാന്‍ ആവശ്യപ്പെട്ടിരുന്നു. എന്നാല്‍ മാനേജര്‍കൂടിയായ ദേവസ്വം ബോര്‍ഡ് പ്രസിഡന്റ് നിര്‍ത്തിവെക്കേണ്ടതില്ലെന്നും റീകൗണ്ടിംഗ് തുടര്‍ന്നോട്ടെ എന്നും പറയുകയായിരുന്നുവെന്ന് പ്രിന്‍സിപ്പാള്‍ പറഞ്ഞു.
പോളിംഗ് നടപടികള്‍ മറ്റു പ്രശഅനങ്ങളൊന്നുമില്ലാതെ നല്ല രീതിയില്‍ നടന്നു. വോട്ടെണ്ണലും പ്രശ്‌നമില്ലാതെയാണ് നടന്നത്. ടാബുലേഷന്‍ വിങ്ങില്‍ നിന്ന് അറിഞ്ഞത് പ്രകാരം വോട്ടെണ്ണലില്‍ ഒരു വോട്ടിന്റെ ഭൂരിപക്ഷം വന്നു. ഇതോടെ എസ്.എഫ്.ഐ റീകൗണ്ടിംഗ് ആവശ്യപ്പെടുകയായിരുന്നു. അങ്ങനെ റീകൗണ്ടിംഗ് നടന്നു.
റീകൗണ്ടിംഗ് നടക്കുന്ന സമയത്ത് അവിടെ കുറച്ച് പ്രശ്‌നങ്ങള്‍ ഉണ്ടായി. അങ്ങനെ റീ കൗണ്ടിംഗ് നിര്‍ത്തിവെക്കാന്‍ പറഞ്ഞിരുന്നു. അപ്പോള്‍ അവിടെയുണ്ടായിരുന്ന കൊച്ചിന്‍ ദേവസ്വം ബോര്‍ഡ് പ്രസിഡന്റ് റീ കൗണ്ടിംഗ് നിര്‍ത്തിവെക്കേണ്ടതില്ലെന്നും തുടരട്ടെയെന്നും നിര്‍ദേശിക്കുകയായിരുന്നു. കോളേജിന്റെ മാനേജര്‍ പറഞ്ഞാല്‍ അനുവദിക്കുകയല്ലേ നിവൃത്തിയുള്ളു എന്നും പ്രിന്‍സിപ്പാള്‍ പറഞ്ഞു.
ടീച്ചറേ അതു നടന്നു പോയക്കോട്ടെ എന്ന രീതിയിലാണ് അദ്ദേഹം പറഞ്ഞതെന്നും എന്തുകൊണ്ടാണ് അങ്ങനെ പറഞ്ഞതെന്ന് അറിയില്ലെന്നും പ്രധാന അധ്യാപിക പറഞ്ഞു.
അതേസമയം കോളേജില്‍ വീണ്ടും തെരഞ്ഞെടുപ്പ് നടത്തുന്നതുമായി ബന്ധപ്പെട്ട് പരാതിയൊന്നും ലഭിച്ചിട്ടില്ല. പരാതി ലഭിച്ചാല്‍ ബാക്കി കാര്യങ്ങള്‍ കമ്മിറ്റി കൂടി പിന്നാലെ തീരുമാനിക്കും. വീണ്ടും തെരഞ്ഞെടുപ്പ് നടത്തുന്നതിനെക്കുറിച്ച് ആലോചിച്ചിട്ടില്ല. പുതുതായി തെരഞ്ഞെടുക്കപ്പെട്ട കോളേജ് യൂണിയന്‍ ഇതുവരെ ഔദ്യോഗികമായി സത്യപ്രതിജ്ഞ ചെയ്തിട്ടില്ലെന്നും പ്രിന്‍സിപ്പാള്‍ പറഞ്ഞു.
