ദുബായ് : യുഎഇ ഇൻകാസ് സെൻട്രൽ കമ്മിറ്റി സംഘടിപ്പിക്കുന്ന ഓണാഘോഷത്തിന് ഒരുക്കങ്ങൾ പൂർത്തീയായി. ഒക്ടോബർ 12 ന് ഞായറാഴ്ച അജ്മാൻ ഇന്ത്യൻ അസോസിയേഷനിലാണ് ഗംഭീര ഓണാഘോഷം. കേരളത്തിൽ നിന്നും കോൺഗ്രസ് പാർട്ടിയുടെ ഉൾപ്പടെ, ഇത്രയധികം യു.ഡി.എഫ് നേതാക്കൾ പങ്കെടുക്കുന്ന ഇന്ത്യയ്ക്ക് പുറത്തുള്ള ഏറ്റവും ആദ്യത്തെ ഗംഭീര ഓണാഘോഷമാകും ഇതെന്ന് ഇൻകാസ് യുഎഇ ഭാരവാഹികൾ, ദുബായിൽ വാർത്താസമ്മേളനത്തിൽ അറിയിച്ചു. യുഎഇയിലെ ഇൻകാസിന്റെ എട്ട് സ്റ്റേറ്റ് കമ്മിറ്റികളുടെ നേതൃത്വത്തിൽ, വിളംബര യാത്രകൾ പൂർത്തീയായി. യുഎഇയിലെ ഏഴ് എമിറേറ്റുകളിലും അൽ ഐന്നിലുമാണ് ഓണവിളംബരം നടന്നത്.
പങ്കെടുക്കാൻ നേതാക്കളുടെ വൻനിര :
കെപിസിസി പ്രസിഡണ്ട് അഡ്വ. സണ്ണി ജോസഫ് എം എൽ എ, കെപിസിസി അധ്യക്ഷൻ എന്ന പദവിയിൽ ,ആദ്യമായി യുഎഇയിൽ പങ്കെടുക്കുന്ന പൊതു പരിപാടിയാണിത്. കൂടാതെ, കേരളത്തിന്റെ പ്രതിപക്ഷ നേതാവ് വി ഡി സതീശൻ, മുൻ പ്രതിപക്ഷ നേതാവും കെപിസിസി പ്രസിഡണ്ടും ആഭ്യന്തര മന്ത്രിയും ആയിരുന്ന രമേശ് ചെന്നിത്തല, ഇന്ത്യൻ യൂണിയൻ മുസ്‌ളീം ലീഗ് അധ്യക്ഷൻ സാദിഖ് അലി ഷിഹാബ് തങ്ങൾ, യുഡിഎഫ് കൺവീനർ അടൂർ പ്രകാശ് എംപി, കെപിസിസി മുൻ പ്രസിഡണ്ടുമാരായ കെ സുധാകരൻ എംപി, എം എം ഹസ്സൻ, കെ മുരളീധരൻ, എറണാകുളം എം പി ഹൈബി ഈഡൻ, കെ പി സി സി ജനറൽ സെക്രട്ടറി എം ലിജു, രാഷ്ട്രീയകാര്യ സമിതി അംഗം എൻ സുബ്രമണ്യൻ, അൻവർ സാദത്ത് എം എൽ എ, മോൻസ് ജോസഫ് എം എൽ എ, കെപിസിസി വൈസ് പ്രസിഡണ്ട് വി പി സജീന്ദ്രൻ, കെപിസിസി ജനറൽ സെക്രട്ടറി എം എം നസീർ, കെപിസിസി ജനറൽ സെക്രട്ടറി അബ്ദുൽ മുത്തലിബ്, ഒഐസിസി-ഇൻകാസ് ഗ്‌ളോബൽ കോർഡിനേറ്റർ മഹാദേവൻ വാഴശേരിൽ ഉൾപ്പടെയുള്ളവർ പങ്കെടുക്കും.
കലാ-സാംസ്‌കാരിക പരിപാടികൾ :
രാവിലെ ഒമ്പത് മുതൽ പതിനൊന്ന് വരെ അത്തപ്പൂക്കള മത്സരം നടക്കും. തുടർന്ന് രാവിലെ 11 മുതൽ മൂന്നു വരെ തിരുവാതിരിക്കളി മത്സരം അരങ്ങേറും. ഇൻകാസിന്റെ എട്ട് സ്റ്റേറ്റ് കമ്മിറ്റികളുടെ നേതൃത്വത്തിൽ വിവിധ മത്സരങ്ങൾ നടക്കും. ഉച്ചയോടെ ആയിരങ്ങൾക്ക് വിഭമസമൃദ്ധമായ ഓണസദ്യ ഒരുക്കും. വാദ്യമേളത്തോടെ കേരളത്തിന്റെ കലാ-സാംസ്‌കാരിക-പൈതൃകം വിളിച്ചറിയിക്കുന്ന ഗംഭീര ഘോഷയാത്ര ഉച്ചക്കഴിഞ്ഞ് മൂന്നിന് തുടങ്ങും. പൊതുസമ്മേളനം മൂന്നരയ്ക്കും ആരംഭിക്കും. ഇതിൽ മുഴുവൻ യുഡിഎഫ് നേതാക്കളും സംബന്ധിക്കും. രാത്രി ഏഴിന് നടനും ഗായകനുമായ സിദ്ധാർത്ഥ് മേനോൻ നയിക്കുന്ന ഗംഭീര സംഗീത പരിപാടിയും നടക്കുമെന്ന് ഭാരാവാഹികൾ വാർത്താസമ്മേളനത്തിൽ പറഞ്ഞു.
വാർത്താസമ്മേളനത്തിൽ പങ്കെടുത്തവർ :
യു.എ.ഇ ഇൻകാസ് പ്രസിഡണ്ട് സുനിൽ അസീസ്, ജനറൽ സെക്രട്ടറി എസ്. മുഹമ്മദ് ജാബിർ , ട്രഷറർ ബിജു എബ്രാഹം, ഓണം ജനറൽ കൺവീനർ സി.എ ബിജു , ഭാരവാഹികളായ ഷാജി പരേത്, ഷാജി ഷംസുദ്ധീൻ , ഷിജി അന്ന ജോസഫ്, സിന്ധു മോഹൻ, ബി. എ നാസർ, റഫീഖ് മട്ടന്നൂർ, അഹമ്മദ് ഷിബിലി , ഹിദായുത്തുള്ള ,ടൈറ്റസ് പുല്ലൂരാൻ , അനന്തൻ കണ്ണൂർ എന്നിവർ സംബന്ധിച്ചു.
