പ്രസവ ശസ്ത്രക്രിയയ്ക്കിടെ കോഴിക്കോട് പന്തീരാങ്കാവ് സ്വദേശി കെ.കെ. ഹര്‍ഷിനയുടെ വയറ്റില്‍ ശസ്ത്രക്രിയ ഉപകരണം കുടുങ്ങിയ സംഭവത്തില്‍ കുറ്റപത്രം സമര്‍പ്പിച്ചു. രണ്ട് ഡോക്ടര്‍മാരെയും രണ്ട് നഴ്‌സുമാരെയും പ്രതികളാക്കിയാണ് കുറ്റപത്രം നല്‍കിയത്. 750 പേജുള്ള കുറ്റപത്രത്തില്‍ 60 സാക്ഷികളുണ്ട്.
ഒന്നാം പ്രതി ഡോ. സി കെ രമേശന്‍, രണ്ടാം പ്രതി സ്വകാര്യ ആശുപത്രിയിലെ ഗൈനക്കോളജിസ്റ്റ് മലപ്പുറം ചങ്കുവെട്ടി മംഗലത്ത് ഡോ എം ഷഹന, മൂന്നും നാലും പ്രതികള്‍ പ്രതി മെഡിക്കല്‍ കോളേജിലെ സ്റ്റാഫ് നഴ്‌സുമാരായ പെരുമണ്ണ പാലത്തും കുഴി എം രഹന, ദേവഗിരി കളപ്പുരയില്‍ കെ ജി മഞ്ജു എന്നിവരാണ്. ഇവര്‍ക്കെതിരെ കുറ്റപത്രം നല്‍കാന്‍ ആരോഗ്യവകുപ്പ് പ്രിന്‍സിപ്പല്‍ സെക്രട്ടറി അനുമതി നല്‍കിയിരുന്നു.
2017 നവംബര്‍ 30ന് മെഡിക്കല്‍ കോളേജില്‍ നടന്ന ശസ്ത്രക്രിയയ്ക്കിടെ വയറ്റില്‍ ശസ്ത്രക്രിയ ഉപകരണം മറന്നുവെച്ച സംഭവത്തില്‍ കുറ്റക്കാര്‍ക്കെതിരെ നടപടി സ്വീകരിക്കണമെന്ന് ആവശ്യപ്പെട്ട് കഴിഞ്ഞ മാര്‍ച്ച് 1നാണ് ഹര്‍ഷിന സിറ്റി പൊലീസ് കമ്മീഷണര്‍ക്ക് പരാതി നല്‍കിയത്.
മെഡിക്കല്‍ നെഗ്ലിജന്‍സ് ആക്ട് പ്രകാരം മെഡിക്കല്‍ കോളേജ് പൊലീസ് രജിസ്റ്റര്‍ ചെയ്ത കേസില്‍ എസിപി കെ സുദര്‍ശന്റെ നേതൃത്വത്തിലാണ് അന്വേഷണം നടത്തിയത്.
കത്രിക കുടുങ്ങിയെന്ന് സംശയിക്കുന്ന സമയത്ത് ഹര്‍ഷിനയ്ക്ക് ശസ്ത്രക്രിയ നടത്തിയ സംഘത്തിലുണ്ടായിരുന്ന നാല് പേര്‍ക്കെതിരെയാണ് ഐപിസി 338 പ്രകാരം പ്രതിചേര്‍ത്തത്.
