ഗൂഗിളിൽ വമ്പൻ മാറ്റങ്ങൾ വരുന്നു. ഗൂഗിൾ സിഇഒ സുന്ദർ പിച്ചൈയാണ് ഇതുസംബന്ധിച്ച സൂചനകൾ പുറത്തുവിട്ടത്. ഗൂഗിൾ സെർച്ചിലേക്ക് ആർട്ടിഫിഷ്യൽ ഇന്റലിജൻസ് പൂർണ്ണമായും സംയോജിപ്പിക്കുമെന്ന് അദ്ദേഹം പറഞ്ഞു. വാൾ സ്ട്രീറ്റ് ജേണലിന് നൽകിയ അഭിമുഖത്തിലാണ് പിച്ചൈ പുതിയ പദ്ധതിയെപ്പറ്റി വെളിപ്പെടുത്തിയത്.
എഐ സംയോജനം ഗൂഗിൾ സെർച്ചിൻറെ ചോദ്യങ്ങളോട് പ്രതികരിക്കാനുള്ള ശേഷി വർദ്ധിപ്പിക്കും എന്നാണ് പിച്ചൈ പറയുന്നത്. ഓപ്പൺ എഐ വികസിപ്പിച്ച ചാറ്റ് ജിപിടിയിൽ നിന്നും ഗൂഗിൾ നേരിടുന്ന മത്സരം ശക്തമാകുന്നതിനിടെയാണ് ഗൂഗിൾ സെർച്ചിലേക്ക് ആർട്ടിഫിഷ്യൽ ഇന്റലിജൻസ് പൂർണ്ണമായും സംയോജിപ്പിക്കാൻ ആൽഫബെറ്റ് ഒരുങ്ങുന്നത്. ഗൂഗിളിന്റെ പുതിയ നീക്കം മൈക്രോസോഫ്റ്റിന്റെ ചാറ്റ്ജിപിടിയെ അതിന്റെ സേർച്ച് എൻജിനായ ബിങ്ങിലേക്ക് സംയോജിപ്പിച്ചതിൽ നിന്ന് പ്രചോദനം ഉൾക്കൊണ്ടതാണെന്നും റിപ്പോർട്ടുകളുണ്ട്. മൈക്രോസോഫ്റ്റ് സേർച്ച് എൻജിന് ചാറ്റിങ് കഴിവുകൾ മാത്രമല്ല, ഇപ്പോൾ എഐ ഇമേജ് ജനറേറ്ററിനെയും പിന്തുണയ്ക്കുന്നുണ്ട്.
അടുത്തിടെ മൈക്രോസോഫ്റ്റ് ചാറ്റ്ജിപിടി നൽകുന്ന ബിങ്ങ് സെർച്ച് എഞ്ചിൻ അവതരിപ്പിച്ചപ്പോൾ ഗൂഗിളിന് കനത്ത തിരിച്ചടിയാണ് നേരിടേണ്ടി വന്നത്.വർഷങ്ങളായി ഗൂഗിളിൻറെ പ്രധാന ബിസിനസിൽ ഒന്നായ സെർച്ചിന് വലിയ ഭീഷണിയാകുമോ ഇതെന്ന ഒരു ചോദ്യം ഉയരുന്നതിനിടെയാണ് ഗൂഗിളും മാറ്റങ്ങൾക്ക് വിധേയമാകാനൊരുങ്ങുന്നത്. അതേസമയം എഐ ചാറ്റ് ബോട്ടുകൾ ഗൂഗിളിന് ഭീഷണിയാകുന്നു എന്ന വാദങ്ങളെ പിച്ചൈ തള്ളികളഞ്ഞു. ഗൂഗിൾ മാതൃ കമ്പനി ആൽഫബെറ്റിൻറെ വരുമാനത്തിൻറെ പകുതിയിലധികം സൃഷ്ടിക്കുന്നത് ഇപ്പോഴും ഗൂഗിൾ സെർച്ചാണ്. പുതിയ എഐ ബോട്ട് പരീക്ഷണങ്ങൾ അതിനാൽ ഈ ബിസിനസിൽ മുമ്പത്തേക്കാൾ വലിയ അവസരമാണ് തുറന്നിടുന്നതെന്നും പിച്ചൈ അഭിമുഖത്തിൽ പറഞ്ഞു.
