കളിത്തോക്കുമായി ട്രെയിനില് യാത്രക്കാരെ ഭീഷണിപ്പെടുത്തിയ സംഭവത്തില് നാല് മലയാളികള് പിടിയില്. പാലക്കാട് തിരുച്ചെന്തൂര് പാസഞ്ചര് ട്രെയിനില് വെച്ചായിരുന്നു സംഭവം.
കാസര്ഗോഡ് സ്വദേശി മുഹമ്മദ്, കണ്ണൂര് സ്വദേശി അബ്ദുള് റഫീക്ക്, മലപ്പുറത്ത് നിന്നുള്ള അമിന് ഷെരീഫ്, പാലക്കാട് സ്വദേശിയായ ജബല് ഷാ എന്നിവരാണ് അറസ്റ്റിലായത്. കൊടൈക്കനാല് റെയില്വേ സ്റ്റേഷനില് വെച്ചാണ് ഇവരെ കസ്റ്റഡിയില് എടുത്തത്.
കളിത്തോക്കില് ബുള്ളറ്റ് ഇടുന്നതായി ഭാവിച്ച് ഇപ്പോള് വെടിവെക്കുമെന്ന് പറഞ്ഞ് യാത്രക്കാരെ പരിഭ്രാന്തിയിലാക്കി. പിന്നാലെ യാത്രക്കാരില് ഒരാള് റെയില്വേ കണ്ട്രോള് റൂമില് വിളിച്ച് അറിയിക്കുകയായിരുന്നു.
തുടര്ന്ന് ട്രെയിന് കൊടൈക്കനാല് റോഡ് റെയില്വേ സ്റ്റേഷനില് എത്തിയപ്പോള് 20 പേരടങ്ങുന്ന സംഘം ഇവര് സഞ്ചരിച്ച കോച്ച് വളഞ്ഞ് യുവാക്കളെ കസ്റ്റഡിയില് എടുക്കുകയായിരുന്നു. ഇവരെ ചോദ്യം ചെയ്ത് വരികയാണ്.
പാലക്കാട് നിന്ന് മധുരയിലെത്തിയ ചെറുപ്പക്കാര് അവിടെ നിന്ന് രാമനാഥപുരത്തേക്ക് പോകാനായിരുന്നു പദ്ധതിയിട്ടത്.
