പ്രമുഖ ബിസിനസ്സ് ഗ്രൂപ്പായ അല് സാബിയുമായി സഹകരിച്ചു ഡോക്സ്റ്റ ഇന്സ്റ്റിറ്റ്യൂട്ട് സംഘടിപ്പിച്ച ജീവന് രക്ഷാ മാര്ഗങ്ങളുടെ പ്രാധാന്യത്തെകുറിച്ച് അബുദാബി ഇന്ത്യന് സ്കൂളില് സൗജന്യ പ്രാഥമിക ശുശ്രൂഷ ബോധവല്ക്കരണ പരിപാടി സംഘടിപ്പിച്ചു. പ്രമുഖ ആരോഗ്യ വിദഗ്ധന് ഡോക്ടര് ഡാനിഷ് സലിമിന്റെ നേതൃത്വത്തിലാണ് ക്ലാസ്സുകള് സംഘടിപ്പിച്ചത് .
മെഡിക്കല് അത്യാഹിതങ്ങള് സംഭവിക്കുമ്പോള് എങ്ങനെ നേരിടണം, അടിയന്തിര ഘട്ടങ്ങളില് വേഗത്തിലും ഉചിതവുമായ പ്രഥമ ശുശ്രൂഷ യുടെ പ്രധാന്യം, തുടങ്ങി കുട്ടികള്ക്കും മുതിര്ന്നവര്ക്കും ഒരുപോലെ പ്രയോജനപ്പെടുന്ന രീതിയിലുള്ള ക്ലാസ്സുകളാണ് സംഘടിപ്പിച്ചത് . ഏകദേശം മുന്നൂറോളം ഇന്ത്യന് സ്കൂള് ജീവനക്കാര്ക്ക് സംഘടിപ്പിച്ച ബോധവല്ക്കരണ പരിപാടിയില് സ്കൂള് പ്രിന്സിപ്പല് നീരജ ഭാര്ഗവ, ഡോക്സ്റ്റ ലെര്ണിങ് ഇന്സ്റ്റിറ്റ്യൂട്ട് ഡയറക്റ്റര് ഡോക്ടര് റൈസാ ഷുക്കൂര് തുടങ്ങി നിരവധി പ്രമുഖര് പങ്കെടുത്തു.
കോവിഡിനു ശേഷം ചെറുപ്പക്കാരിലടക്കം നിശ്ശബ്ദ ഹൃദയാഘാതം ഉള്പ്പെടെയുള്ള ഹൃദയപ്രശ്നങ്ങള്, പൊതുസ്ഥലങ്ങളില് കുഴഞ്ഞുവീണ് മരണം സംഭവിക്കല് വരെ തുടര്ക്കഥയാകുന്ന സാഹചര്യത്തില് ഇത്തരം ജീവന് രക്ഷാ മാര്ഗങ്ങളുടെ ക്ളാസുകള്ക്കും പരിശീലനങ്ങള്ക്കും സ്വീകാര്യത വര്ധിക്കുകയാണെന്ന് ഡോക്സ്റ്റാ ഡയറക്റ്റര് ഡോക്ടര് റൈസാ ഷുക്കൂര് അഭിപ്രായപ്പെട്ടു. ഇന്ത്യയുടെ വിവിധ സംസ്ഥാനങ്ങള് കേന്ദ്രികരിച്ച് ഇതിനോടകം ഒന്നര ലക്ഷത്തോളം സൗജന്യ ക്ളാസ്സുകള് സംഘടിപ്പിച്ചിട്ടുണ്ടെന്നും വരും മാസങ്ങളില് യു.എ.ഇയുടെ വിവിധ എമിറേറ്റുകള് കേന്ദ്രികരിച്ചു സൗജന്യ ക്ളാസ്സുകള് സംഘടിപ്പിക്കുമെന്നും ഡോക്സ്റ്റ അധികൃതര് അറിയിച്ചു .
