ദുബായ് ഫിറ്റ്നസ് ചലഞ്ചിൻ്റെ ഭാഗമായുള്ള ദുബായ് റണ്‍ നാളെ നടക്കും. ശൈഖ് സായിദ് റോഡിലും മുഹമ്മദ് ബിന്‍ റാഷിദ് ബൊളിവാര്‍ഡ് റോഡിലുമായാണ് റണ്ണിംഗ് ട്രാക്കുകൾ സജ്ജമാക്കിയിട്ടുള്ളത്. പുലര്‍ച്ചെ 6.30നാണ് റൈഡ് നടക്കുക. മുന്‍കൂര്‍ രജിസ്റ്റര്‍ ചെയ്തവര്‍ക്കാണ് ദുബായ് റണ്ണില്‍ പങ്കെടുക്കാന്‍ അവസരമുള്ളത്.
ആയിരക്കണക്കിന് ആളുകൾ പങ്കെടുക്കുന്നതിനാൽ റണ്ണിംഗ് ട്രാക്കിന്‍റെ ഭാഗമായായുളള പ്രധാന പാതകൾ അടച്ചിടും. പുലര്‍ച്ചെ 4 മണി മുതല്‍ 10 മണിവരെ ഗതാഗത നിയന്ത്രണമുണ്ടായിരിക്കും.
ഏത് പ്രായക്കാർക്കും ദുബായ് റണ്ണില്‍ പങ്കെടുക്കാം. അഞ്ച് കിലോമീറ്ററും പത്ത് കിലോമീറ്ററും ദൈർഘ്യമുള്ള രണ്ട് പാതകളാണുള്ളത്. കുടുംബങ്ങൾ, കാൽനടത്തക്കാർ തുടങ്ങിയവർക്കായാണ് അഞ്ച് കിലോമീറ്ററിന്‍റെ ചെറിയ ട്രാക്കും കായികശേഷിയുളളവര്‍ക്കും ഓട്ടക്കാര്‍ക്കുമായി പത്ത് കിലോമീറ്റര്‍ പാതയുമാണ് ഒരുക്കിയിട്ടുള്ളത്
രജിസ്‌ട്രേഷൻ പൂർത്തിയാക്കിയവർ തങ്ങളുടെ ഔദ്യോഗിക നമ്പർ അടങ്ങിയ സ്റ്റിക്കർ ഇബ്ൻ ബത്തൂത്ത മാൾ, ദുബായ് ഹിൽസ് മാൾ, ദൈറ സിറ്റി സെന്റർ എന്നിവിടങ്ങളിൽ നിന്ന് കൈപ്പറ്റണം. നവംബർ 17 മുതൽ 19 വരെ (ഇന്ന്) ഈ മാളുകൾ പ്രവർത്തിക്കുന്ന സമയങ്ങളിൽ ഔദ്യോഗിക നമ്പർ ലഭ്യമായിരിക്കും.
ദുബായ് റണ്ണിന് എത്തുന്നവർ സമയക്രമം പാലിക്കണം. പ്രവേശന ഗേറ്റുകളില്‍ എത്തിച്ചേരേണ്ട സമയം രജിസ്ട്രേഷന്‍ പാസ്സിൽ വ്യക്തമാണ്. മുന്‍ വര്‍ഷത്തേക്കാൾ ജനപങ്കാളിത്തം ഇത്തവണ ദുബായ് ഫിറ്റ്നസ് ചലഞ്ചില്‍ ഉണ്ടായിരുന്നു. ഒരുമാസം നീണ്ടു നില്‍ക്കുന്ന ഫിറ്റ്നസ് ചലഞ്ച് പകുതി ദിവസങ്ങൾ പിന്നിട്ടിരിക്കുകയാണ്.
ദുബായിലെ ചില റോഡുകള്‍ നാളെ ഭാഗികമായി അടച്ചിടുമെന്ന് ആര്‍ടിഎ
ശൈഖ് സായിദ് റോഡ് നാളെ അടച്ചിടുമെന്ന് റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി (ആര്‍ ടി എ) അറിയിച്ചു. നവംബര്‍ 20 ഞായറാഴ്ചയാണ് റോഡ് അടക്കുക.
അടയ്ക്കുന്ന റോഡുകൾ
ശൈഖ് സായിദ് റോഡ്, മുഹമ്മദ് ബിന്‍ റാഷിദ് ബോലെവാഡ് റോഡ് – രാവിലെ നാലു മണി മുതല്‍ രാവിലെ 10 മണി വരെ.
ഫിനാന്‍ഷ്യല്‍ സെൻ്റര്‍ റോഡ്- രാവിലെ നാലു മണി മുതല്‍ രാവിലെ 10 മണി വരെ
വാഹനയാത്രികര്‍ ഈ റോഡുകള്‍ക്ക് പകരമുള്ള റൂട്ടുകളില്‍ യാത്ര ചെയ്യണമെന്ന് അധികൃതര്‍ നിർദേശിച്ചു. അല്‍ വാസ്ല്‍ സ്ട്രീറ്റ്, അല്‍ ഖൈല്‍ റോഡ്, അല്‍ മെയ്ദാന്‍ സ്ട്രീറ്റ്, അല്‍ അസായേല്‍ സ്ട്രീറ്റ്, സെക്കന്‍ഡ് സബീല്‍ സ്ട്രീറ്റ്, സെക്കന്‍ഡ് ഡിസംബര്‍ സ്ട്രീറ്റ്, അല്‍ ഹാദിഖ സ്ട്രീറ്റ് എന്നിവയാണ് പകരമുള്ള റൂട്ടുകള്‍.
